How To Exchange Torn Notes : చినిగిన, తడిసిన, పాడైన కరెన్సీ నోట్లను మార్చుకోవడం ఇబ్బందికరంగా ఉంటుంది. అయితే వీటిని బ్యాంకుల్లో మార్చుకోవచ్చు. కానీ పాడైన కరెన్సీ నోట్లను మార్చుకునే విధానం తెలియక చాలా మంది నష్టపోతుంటారు. రిజర్వ్ బ్యాంక్ ఆఫ్ ఇండియా (RBI) వెబ్‌సైట్ ప్రకారం పాతబడిన, తడిసిన నోట్లు, రెండు ముక్కలుగా చిరిగిన నోట్లను బ్యాంకులకు వెళ్లి మార్చుకోవచ్చు. అయితే ఇందులో కొన్ని నియమ, నిబంధనలు ఉన్నాయి. అవేంటే ఇప్పుడు చూద్దాం.
తడిసిన నోట్లు : రిజర్వ్ బ్యాంక్ ఆఫ్ ఇండియా (RBI) వెబ్‌సైట్ ప్రకారం పాతబడిన, తడిసిన నోట్లు, రెండు ముక్కలుగా ఉన్న నోట్లు బ్యాంకుల్లో మార్చుకోవచ్చు. అలాగే వీటిని ప్రభుత్వ బకాయిలు చెల్లించేందుకు, పబ్లిక్ అకౌంట్స్కు క్రెడిట్ చేసేందుకు బ్యాంకులకు ఇవ్వవచ్చు. బ్యాంకులు కూడా వీటిని కచ్చితంగా స్వీకరించాల్సి ఉంటుంది.
మ్యుటిలేటెడ్ నోట్స్ :
మ్యుటిలేటెడ్ నోట్ అంటే సగానికి చినిగిన కరెన్సీ నోటు లేదా రెండు కంటే ఎక్కువ ముక్కలుగా చిరిగిపోయిన నోటు అని అర్థం. ఈ నోట్లను ఏ బ్యాంకులోనైనా మార్చుకోవచ్చు.
బాగా దెబ్బతిన్న నోట్లు :
చాలా పెళుసుగా ఉన్న నోట్లు, కాలిపోయినవి లేదా సాధారణంగా హ్యాండిల్ చేయలేని స్థితికి చేరిన, అతుక్కుపోయిన నోట్లను సాధారణ బ్యాంక్ బ్రాంచ్‌లలో మార్పిడి చేయలేము. కనుక ఇలాంటి నోట్లు ఉన్నవాళ్లు, వాటిని రిజర్వ్ బ్యాంక్ ఆఫ్ ఇండియా ఇష్యూ కార్యాలయానికి సమర్పించాల్సి ఉంటుంది. అక్కడ వాటిని ప్రత్యేక విధానంలో సరిచూసి, మీకు డబ్బులు తిరిగి చెల్లిస్తారు.
కరెన్సీ నోట్ల మార్పిడి పరిమితులు :
ఒక వ్యక్తి రోజుకు 20 నోట్లను లేదా గరిష్ఠం రూ.5,000 విలువైన నోట్లను మాత్రమే బ్యాంకుల్లో ఉచితంగా మార్చుకోవచ్చు. నోట్ల సంఖ్య 20 దాటినా లేదా రోజుకు రూ.5,000 కంటే ఎక్కువ విలువైన నోట్లు మార్చాల్సి వచ్చినా, బ్యాంకులు వాటిని ఆమోదించి రశీదు అందజేస్తాయి. పైగా సర్వీసు ఫీజు కూడా వసూలు చేస్తాయి. రూ.50,000 కంటే ఎక్కువ మొత్తంలో నోట్లు మార్చాల్సి వస్తే, బ్యాంకులు ప్రామాణిక పద్ధతిని పాటిస్తాయి.
