HDFC Bank Scheduled Downtime : మన దేశంలోని అతిపెద్ద ప్రైవేట్ రంగ బ్యాంక్ అయిన హెచ్డీఎఫ్సీ బ్యాంక్ (HDFC bank) జులై 13న తమ సిస్టమ్‌ను అప్గ్రేడ్ చేయనున్నట్లు తెలిపింది. కస్టమర్లకు మెరుగైన సేవలు అందించేందుకు, బ్యాంకింగ్‌ అనుభూతిని మరింత మెరుగుపరిచేందుకు ఈ అప్గ్రేడ్ చేస్తున్నట్లు స్పష్టం చేసింది. జులై 13న (శనివారం) ఉదయం 3 గంటల నుంచి ఆ రోజు సాయంత్రం 4.30 గంటల వరకు ఈ అప్గ్రేడ్ ప్రక్రియ కొనసాగనుంది. కనుక ఆ సమయంలో ఖాతాదారులకు కొన్ని సర్వీసులు అందుబాటులో ఉండవని హెచ్డీఎఫ్సీ బ్యాంక్ ఓ ప్రకటనలో తెలిపింది.
కస్టమర్ల పరిస్థితి ఏమిటి?
సుమారు 13.30 గంటల పాటు ఈ అప్గ్రేడ్ ప్రక్రియ కొనసాగుతుంది. కనుక ఆ సమయంలో బ్యాంకింగ్‌, పేమెంట్‌ సేవలు తాత్కాలికంగా అందుబాటులో ఉండవని హెచ్డీఎఫ్సీ బ్యాంక్ తెలిపింది. కస్టమర్లు ఎలాంటి అసౌకర్యానికి గురికాకుండా ఉండేందుకు, జులై 12నే తగినంత మొత్తాన్ని విత్‌డ్రా చేసుకోవాలని, ఏవైనా చెల్లింపులు చేయాల్సి ఉంటే, వాటిని ముందస్తుగానే చేసుకోవాలని సూచించింది. తమ ఖాతాదారులపై ప్రభావం తగ్గించేందుకే, సెలవు రోజున అప్‌గ్రేడింగ్‌ ప్రక్రియను చేపడుతున్నామని తెలిపింది. కనుక దీనికి అందరూ సహకరించాలని విజ్ఞప్తి చేసింది.
ఈ సర్వీసులు ఉండవ్!
అప్‌గ్రేడింగ్‌ ప్రక్రియలో భాగంగా జులై 13వ తేదీ వేకువ జామున 3 గంటల నుంచి 3.45 గంటల వరకు; తెల్లారిన తరువాత ఉదయం 9.30 గంటల నుంచి 12.45 గంటల వరకు యూపీఐ సేవలు అందుబాటులో ఉండవని బ్యాంక్ తెలిపింది. నెట్‌ బ్యాంకింగ్‌ సేవలు కూడా పాక్షింకంగానే అందుబాటులో ఉంటాయని పేర్కొంది. ఇక ఏటీఎం/ డెబిట్‌ కార్డులకు సంబంధించి ఎంపిక చేసిన కొన్ని సర్వీసులు కొంత సమయం పాటు అందుబాటులో ఉండవని తెలిపింది. అయితే క్రెడిట్‌ కార్డు సర్వీసులు మాత్రం యథావిధిగా కొనసాగుతాయని స్పష్టం చేసింది. ఏయే సర్వీసులు, ఏయే సమయాల్లో అందుబాటులో ఉంటాయో, ఏ టైమ్లో ఉండవో, హెచ్డీఎఫ్సీ బ్యాంక్ ఓ టేబుల్‌ రూపంలో విడుదల వెల్లడించింది. అలాగే ఆయా సర్వీసులకు సంబంధించిన సమగ్ర సమాచారాన్ని తమ వెబ్‌సైట్‌లో ఉంచింది. ఆ వివరాల కోసం ఈ లింక్‌ క్లిక్‌ చేయండి.
స్టెప్-అప్ Vs స్టెప్-డౌన్ హోమ్ లోన్ - వీటిలో ఏది బెస్ట్ ఆప్షన్? - Step Up Home Loan
