ఎవరెస్టు శిఖరాన్ని అధిరోహించిన రెండున్నరేళ్ల చిన్నారి- బుడిబుడి అడుగులతో రికార్డ్​ - Youngest Child Climb Mount Everest

Youngest Child To Climb Mount Everest : వయస్సును మించిన సాహసంతో చరిత్ర సృష్టించిందో చిన్నారి. మధ్యప్రదేశ్​లోని భోపాల్​కు చెందిన రెండున్నరేళ్ల చిన్నారి సిద్ధి మిశ్ర అతిపిన్న వయసులోనే ఎవరెస్ట్​ పర్వత బేస్​క్యాంపుపైకి చేరుకుంది. దీంతో కేవలం రెండున్నరేళ్ల వయసులోనే ఎవరెస్ట్​ బేస్​ క్యాంప్​ ఎక్కిన చిన్నారుల్లో ఒకరిగా నిలిచింది.

Youngest Child To Climb Mount Everest : ఎవరెస్టు- ప్రపంచంలోనే అతి ఎత్తైన శిఖరం. ఈ శిఖరాన్ని అధిరోహించాలంటే బలంగా ఉండాలి. అక్కడి వాతావరణ పరిస్థితులను తట్టుకుని ముందుకు సాగాలి. పెరుగుతున్న ఉష్ణోగ్రతలు, కరుగుతున్న హిమానీనదాలు, మంచు ప్రతికూల పరిస్థితులు, ఇలాంటి పరిస్థితిలో పెద్ద పెద్దవారే ఎవరెస్టు శిఖరం ఎక్కేందుకు జంకుతుంటారు. అలాంటిది ఓ రెండున్నరేళ్ల సిద్ధి మిశ్ర అనే చిన్నారి ఎవరెస్టు శిఖరాన్ని చేరుకుంది. భారతదేశంలో అతిపిన్న వయస్సులోనే ఎవరెస్టు పర్వత బేస్​ క్యాంపుపైకి ఎక్కిన చిన్నారిగా పేరు తెచ్చుకుంది. బుడిబుడి అడుగులు వేస్తూ ఎవరెస్టును అధిరోహించిన ఆ చిన్నారి సాహసాన్ని ప్రతి ఒక్కరూ మెచ్చుకుంటున్నారు.

• STORY | Toddler girl from Bhopal reaches Mt Everest Base Camp
  
  READ: https://t.co/NFWnc4FzzF
  
  VIDEO: pic.twitter.com/2Mg6ZBdEIy

  — Press Trust of India (@PTI_News) March 26, 2024

10 రోజుల్లో 53కి.మీలు!
సముద్ర మట్టానికి 17,598 అడుగుల ఎత్తున భారత పతాకాన్ని ఎగురవేసింది. ఎక్స్ పెడిషన్ హిమాలయ కంపెనీ ఎండీ నబీన్ త్రితాల్ ఈ విషయాన్ని ధ్రువీకరించారు. చిన్నారి తన తండ్రి మహీం మిశ్రతోపాటు 2019లో విజయవంతంగా ఎవరెస్టు శిఖరాన్ని అధిరోహించిన తల్లి భావనా దేహరియాలతో కలిసి మార్చి 22న సిద్ధి మిశ్ర ఈ ఘనతను సాధించింది. ఎవరెస్టు ఈశాన్య ప్రాంతంలో ఉన్న నేపాల్​లోని లక్లా నుంచి మార్చి 12న పర్వతారోహణను మొదలుపెట్టిన ఈ కుటుంబం 10 రోజుల్లో 53 కి.మీల దూరాన్ని పూర్తి చేసి తామనుకున్న లక్ష్యాన్ని ఛేదించింది. తమ కుమార్తెతో కలిసి ఎవరెస్టును అధిరోహించడంపై భావన సంతోషం వ్యక్తి చేశారు. మధ్యప్రదేశ్​ ప్రభుత్వం చేపట్టిన బేటీ బచావో, బేటీ పడావో కార్యక్రమానికి ఈ విజయాన్ని అనుసంధానం చేశారు.

ఈ ఏడాది ప్రారంభంలో స్కాట్లాండ్​కు చెందిన రెండేళ్ల చిన్నారి కూడా ఎవరెస్టు బేస్​ క్యాంపును చేరుకుంది. ఈ చిన్నారిని తన తండ్రి వీపుపై మోస్తూ పర్వతారోహణ చేశారు. కాగా, గతేడాది అక్టోబర్​ 25న బ్రిటన్​​కు చెందిన రెండేళ్ల బుడ్డోడు టాట్ కార్టర్ ఎవరెస్టు ఎక్కి అందరినీ ఆశ్చర్యపరిచాడు. ప్రపంచంలోనే అత్యంత పిన్న వయస్కుడైన పర్వతారోహకునిగా టైటిల్​ను దక్కించుకుని అందరి దృష్టి తనవైపు తిప్పుకున్నాడు. గతంలో చెక్​ రిపబ్లిక్​కు చెందిన నాలుగేళ్ల చిన్నారి సైతం ఎవరెస్ట్​ బేస్​ క్యాంపును చేరుకుని అందర్నీ ఆశ్చర్యపరిచింది.