ఇంట్లో టైల్స్ మధ్య మురికి పేరుకుపోయిందా? - ఈ టిప్స్​ పాటిస్తే కొత్తవాటిలా మెరుస్తాయి! - Tips to Clean Dust Between Tiles

Ways to Clean Tiles: మంచి లుక్​ కోసం, ఇళ్లు అందంగా కనిపించడం కోసం ప్రస్తుతం ప్రతి ఒక్కరూ టైల్స్​ వాడుతున్నారు. అయితే.. కొన్ని రోజుల తర్వాత టైల్స్ మధ్య మురికి చేరుతుంటుంది. ఎంత శుభ్రం చేసినా వదలదు. కొన్ని చిట్కాలు పాటిస్తే.. తళతళా మెరిపించవచ్చని అంటున్నారు నిపుణులు!

Tips to Clean Dust Between Tiles: ప్రస్తుతం ఎవరి ఇంట్లో చూసినా ఎక్కువ శాతం టైల్స్​ కనిపిస్తున్నాయి. హాల్​, బెడ్​రూమ్​, కిచెన్​, బాత్రూమ్​ ఇలా రూమ్​కు తగ్గట్టుగా టైల్స్​ వేయించుకుంటున్నారు. టైల్స్‌ ఇంటికి ఎలిగెంట్‌ లుక్‌ తీసుకొస్తాయి మరి. అందుకే.. అందరూ ఇదే ట్రెండ్ ఫాలో అవుతున్నారు. అయితే.. టైల్స్​ను ఎప్పటికప్పుడు శుభ్రం చేస్తున్నా సరే వాటి మధ్య మురికి చేరుతుంటుంది. కొన్ని రోజుల్లో అది కాస్తా గట్టిపడిపోతుంది. ఫలితంగా ఎంత ప్రయత్నించినా మురికి వదలదు. ఇలా చూస్తుండగానే పాత వాటిలా మారిపోతాయి.

అయితే.. టైల్స్​ మధ్య చేరిన మురికిని కొన్ని చిట్కాల ద్వారా పోగొట్టవచ్చని అంటున్నారు నిపుణులు. ఈ టిప్స్ ద్వారా మురికి పోవడంతోపాటు కొత్తవాటిలా మెరిసిపోతూ ఉంటాయని చెబుతున్నారు. ఆ టిప్స్​ ఏంటో ఈ స్టోరీలో చూద్దాం..

వెనిగర్​: టైల్స్​ మధ్య మురికిని క్లీన్​ చేయడంలో వెనిగర్​ ఎఫెక్టివ్​గా పనిచేస్తుందని నిపుణులు అంటున్నారు. అందుకోసం వెనిగర్‌, గోరువెచ్చని నీటిని సమపాళ్లలో తీసుకొని మిక్స్​ చేసుకోవాలి. దీన్ని స్ప్రే బాటిల్‌లో పోసి టైల్స్‌ మధ్య మురికి పేరుకున్న చోట స్ప్రే చేయాలి. ఐదు నిమిషాల తర్వాత స్క్రబ్​ లేదా బ్రష్‌తో రుద్దితే మురికి వదిలిపోయి ఫ్లోర్‌ శుభ్రంగా తయారవుతుంది.

నిమ్మరసం: ఇది కూడా మురికిని వదిలించడంలో సహాయపడుతుంది. ఇందుకోసం నిమ్మరసాన్ని నీటిలో కలిపి మురికిగా ఉన్న చోట స్ప్రే చేయాలి. ఆ తర్వాత స్క్రబ్బర్‌తో రుద్ది శుభ్రం చేస్తే మురికి వదిలిపోతుంది. అయితే నిమ్మ వల్ల టైల్స్‌ నునుపుదనం తగ్గే అవకాశం ఉంటుంది కాబట్టి.. కాస్త ఎక్కువ నీటిలో కొద్దిగా నిమ్మరసాన్ని కలిపితే సరిపోతుంది.

బేకింగ్​ సోడా: బేకింగ్​ సోడా కూడా టైల్స్​ మధ్య మురికిని పోగొట్టడానికి సహాయపడుతుంది. ఒక గిన్నెలో బేకింగ్​ సోడాను తీసుకుని అందులో కొద్దిగా నీళ్లు పోసుకుని పేస్టులాగా చేసుకోవాలి. తర్వాత ఆ పేస్ట్​ను మురికి ఉన్న ప్రదేశంలో అప్లై చేసి 15 నిమిషాలు వదిలేయాలి. తర్వాత స్క్రబ్బర్​ సాయంతో క్లీన్​ చేస్తే మురికి వదులుతుంది.

హైడ్రోజన్‌ పెరాక్సైడ్‌: దెబ్బలు తగిలినప్పుడు ఆ భాగాన్ని క్లీన్​ చేయడానికి ఉపయోగించే హైడ్రోజన్‌ పెరాక్సైడ్‌ని సైతం టైల్స్‌ మధ్య చేరిన మురికిని పోగొట్టడానికి ఉపయోగించవచ్చని నిపుణులు అంటున్నారు. దీన్ని నేరుగా ఫ్లోర్‌ని శుభ్రం చేయడానికి వాడుకోవచ్చంటున్నారు. లేదంటే దీనిలో బేకింగ్‌ సోడాను కలిపి చిక్కటి పేస్ట్‌లా తయారుచేసి టైల్స్‌ మధ్య రాసి ఆ తర్వాత నీటితో కడిగినా మంచి ఫలితం కనిపిస్తుంది.