Public Examinations Bill 2024 : కేంద్ర ప్రభుత్వ సంస్థలు నిర్వహించే పోటీ పరీక్షల్లో అక్రమాలను అడ్డుకునేందుకు వీలుగా తీసుకొచ్చిన 'పబ్లిక్ ఎగ్జామినేషన్స్ (ప్రివెన్షన్ ఆఫ్ అన్ఫెయిర్ మీన్స్) బిల్లు, 2024'ను శుక్రవారం పార్లమెంట్ ఆమోదించింది. సోమవారం లోక్సభ ఆమోదించిన ఈ బిల్లును శుక్రవారం రాజ్యసభలో ప్రవేశపెట్టారు. ప్రతిపక్షాలు ప్రతిపాదించిన సవరణలు తిరస్కరించి ఓటింగ్ నిర్వహించగా, మోజారిటీ సభ్యులు ఈ బిల్లుకు అనుకూలంగా ఓటు వేశారు. దీంతో ఈ బిల్లుకు రాజ్యసభ ఆమోదం లభించింది.
ఈ బిల్లుపై జరిగిన చర్చకు కేంద్ర మంత్రి జితేంద్ర సింగ్ సమాధానమిచ్చారు. 'దేశంలోని కీలకమైన యువశక్తి, కొంతమంది చేతుల్లో లొంగిపోవడాన్ని మేము అనుమతించలేం. అందుకే చాలా జాగ్రత్తగా మేము విద్యార్థులను, నిజాయితీ గల ఉద్యోగార్థులను ఈ చట్ట పరిధి నుంచి మినహాయించాం. కాబట్టి ఈ కొత్త చట్టం యువతను వేధించడానికి ఉద్దేశింది కాదు. ఎవరైతే వారి భవిష్యత్తు, తద్వారా దేశ భవిష్యత్తుతో ఆడుకుంటున్నారో వారిని అడ్డుకోవడానికి మాత్రమే ఈ చట్టం తెచ్చాం' అని జితేంద్ర సింగ్ తెలిపారు.
చట్టం అమలైతే ఏం జరుగుతుంది?
ఈ చట్టం అమల్లోకి వస్తే పోటీ పరీక్షల్లో పేపరు లీకేజీకి పాల్పడినా, మాల్‌ ప్రాక్టీస్‌ చేసినా, నకిలీ వెబ్‌సైట్లను సృష్టించినా కనిష్ఠంగా మూడేళ్ల నుంచి గరిష్ఠంగా ఐదేళ్ల జైలు శిక్ష విధిస్తారు. అంతేకాకుండా రూ.కోటి వరకు జరిమానా కూడా పడుతుంది. ఈ చట్టం వ్యవస్థీకృత ముఠాలు, మాఫియాపై ఉక్కుపాదం మోపుతుంది. వారితో చేతులు కలిపిన ప్రభుత్వ అధికారులపై కూడా చట్ట ప్రకారం చర్యలు తీసుకుంటారు. యూనియన్ పబ్లిక్ సర్వీస్ కమిషన్ (UPSC), స్టాఫ్ సెలెక్షన్ కమిషన్ (SSC), రైల్వే రిక్రూట్మెంట్ బోర్డ్ (RRB), ఇన్స్టిట్యూట్ ఆఫ్ బ్యాంకింగ్ పర్సనల్ (IBPS), నేషనల్ టెస్టింగ్ ఏజెన్సీ (NTA) వంటి సంస్థలు నిర్వహించే పోటీ పరీక్షలు ఈ చట్టం పరిధిలోకి వస్తాయి.
ఈ నేరాలకు పాల్పడితే, శిక్షలు తప్పవు!
- ప్రశ్న పత్రాలు, సమాధాన పత్రాల లీకేజీలో ప్రత్యక్షంగా, పరోక్షంగా పాలుపంచుకోవడం
- అభ్యర్థులకు నేరుగా గానీ, ఇతర మార్గాల ద్వారా గానీ సహకరించడం
- కంప్యూటర్‌ నెట్‌వర్క్‌ను ట్యాంపరింగ్‌ చేయడం
- నియామక సంస్థల పేరుతో నకిలీ వెబ్‌సైట్లను సృష్టించడం
- నకిలీ పరీక్షలను నిర్వహించడం
- నకిలీ అడ్మిట్‌ కార్డులను జారీ చేయడం
- నకిలీ నియామక పత్రాలను ఇవ్వడం శిక్షార్హం.
పరీక్షల సమయంలో అనుకూలురకు సీట్లను మార్చడం పరీక్ష తేదీలను, షిఫ్టులను అనుకూలంగా మార్చడం సైతం శిక్షార్హమే.
