Prajwal Revanna Sex Scandal : హాసన్ సెక్స్ రాకెట్లో ఆరోపణలు ఎదుర్కొంటూ విదేశాలకు పారిపోయిన ఎంపీ ప్రజ్వల్ రేవణ్ణపై బ్లూ కార్నర్ నోటీసు జారీ అయ్యింది. ఈ విషయాన్ని కర్ణాటక హోంమంత్రి డాక్టర్ జీ పరమేశ్వర ఆదివారం వెల్లడించారు. ఆయనను తిరిగి భారత్కు రప్పించేందుకు ఇంటర్పోల్ అధికారుల సాయం తీసుకుంటున్నట్లు ఆయన వివరించారు. ప్రపంచంలోని అన్ని దేశాలకు ఇంటర్ పోల్ సమాచారం ఇచ్చి ఆయన్ను గుర్తిస్తుందని తెలిపారు. ప్రజ్వల్ను తిరిగి రప్పించే విషయాన్ని సిట్ చూసుకుంటుందని చెప్పారు. ప్రత్యేక దర్యాప్తు బృందం పనితీరును అభినందించిన పరమేశ్వర, సిట్ చట్ట ప్రకారం నడుచుకుంటుందన్నారు.
అంతర్జాతీయ పోలీసు సహకార సంస్థ నేరానికి సంబంధించిన నిందితుడి ఆచూకీ, వారి కార్యకలపాల అదనపు సమాచారాన్ని దాని సభ్య దేశాల నుంచి సేకరించేందుకు బ్లూకార్నర్‌ నోటీసును జారీ చేస్తుంది.
ఏ క్షణమైనా భారత్కు వచ్చే ఛాన్స్!
మరోవైపు ప్రజ్వల్ రేవణ్ణ ఆదివారం భారత్కు తిరిగి వచ్చే అవకాశం ఉన్నట్లు తెలుస్తోంది. బెంగళూరు, మంగళూరు, గోవాలో ఆయన దిగే అవకాశం ఉన్నట్లు సమాచారం. ప్రజ్వల్ రేవణ్ణ బాధితులు ఫిర్యాదు చేసేందుకు ప్రత్యేక హెల్ప్ లైన్ నంబర్లను ఏర్పాటు చేసింది సిట్.
రేవణ్ణకు నాలుగు రోజుల సిట్ కస్టడీ
సిట్ అదుపులో ఉన్న ప్రజ్వల్ తండ్రి, JDS ఎమ్మెల్యే HD రేవణ్ణను ఎసీఎమ్ఎమ్ కోర్టు జడ్జి ఎదుట హాజరుపరిచారు అధికారులు. అనంతరం నాలుగు రోజుల సిట్ కస్టడీ విధించారు జడ్జి. అంతకుముందు ఆయన్ను వైద్య పరీక్షల కోసం బౌరింగ్ అండ్ లేడీ కర్జన్ ఆస్పత్రికి తీసుకెళ్లారు. అక్కడి నుంచి స్థానిక కోర్టుకు తరలించారు. ఈ సమయంలో మీడియాతో మాట్లాడిన రేవణ్ణ, ఇదంతా రాజకీయ కుట్రగా అభివర్ణించారు. తనకు వ్యతిరేకంగా ఎలాంటి ఆధారాలు లేకుండానే నిందితుడిని చేశారని తెలిపారు. శనివారం రాత్రి HD రేవణ్ణను సిట్ అధికారులు ఓ మహిళ కిడ్నాప్‌ కేసును ప్రాథమిక కారణంగా చూపి అరెస్ట్‌ చేశారు.
మోదీ, షాకు కాంగ్రెస్ 10 ప్రశ్నలు
మరోవైపు ప్రజ్వల్ రేవణ్ణ సెక్స్ రాకెట్పై కాంగ్రెస్ తీవ్రంగా స్పందించింది. ఈ అంశంపై సమాధానం ఇవ్వాలంటూ ప్రధాన మంత్రి నరేంద్ర మోదీ, కేంద్ర హోం మంత్రి అమిత్ షాకు 10 ప్రశ్నలను సంధించింది. బీజేపీ కూటమిలో జేడీఎస్‌ ఉన్నందున వారిని రక్షించేందుకు ప్రధాని మోదీ, కేంద్ర హోంమంత్రి అమిత్ షా ప్రయత్నాలు చేస్తున్నారని కాంగ్రెస్ ఆరోపించింది. ప్రజ్వల్‌కు సంబంధించిన సమాచారం ఉన్నప్పటికీ ఆ పార్టీతో ఎందుకు పొత్తు పెట్టుకున్నారని బీజేపీని ప్రశ్నించింది. ప్రజ్వల్ దేశం విడిచి పారిపోకుండా విదేశాంగ శాఖ ఎందుకు అడ్డుకోలేక పోయిందని కాంగ్రెస్ ప్రధాన కార్యదర్శి, ఆ రాష్ట్ర ఇంఛార్జ్‌ రణ్‌దీప్‌ సుర్జేవాలా ప్రశ్నించారు. నిందితుడికి ఉన్న దౌత్య పాస్‌పోర్టును ఇంకా ఎందుకు రద్దు చేయలేదని, అతడిని స్వదేశానికి తీసుకు వచ్చేందుకు ఇంటర్పోల్ ద్వారా నోటీసులు ఎందుకు ఇవ్వలేదని అడిగారు.
సిట్ అదుపులో హెచ్డీ రేవణ్ణ- ముందస్తు బెయిల్ పిటిషిన్ కొట్టేసిన కోర్టు - hasan sex scandal
