'ఎన్నికల ముందు ఓట్లు చీల్చే ప్రయత్నం'- CAA అమలుపై విపక్షాలు ఫైర్​

Oppositions On CAA Rules Notification : సార్వత్రిక ఎన్నికల ముందు పౌరసత్వ సవరణ చట్టం అమలు నిబంధనలను నోటిఫై చేస్తూ కేంద్రం తీసుకున్న నిర్ణయంపై ప్రతిపక్షాలు మండిపడ్డాయి. ఎన్నికలకు కొద్దిరోజుల ముందు సీఏఏ అమలు చేసి ఓట్ల చీల్చేలా ప్రణాళిక రచించిందని ఆరోపించింది కాంగ్రెస్​.

Oppositions On CAA Rules Notification : వివాదాస్పద పౌరసత్వ సవరణ చట్టం అమలు నిబంధనలను నోటిఫై చేస్తూ కేంద్రం తీసుకున్న నిర్ణయంపై విపక్షాలు భగ్గుమన్నాయి. ప్రధాన ప్రతిపక్షం కాంగ్రెస్​ సహా టీఎంసీ, సీపీఐ పార్టీలు సీఏఏ అమలును వ్యతిరేకించాయి. ఎన్నికలకు కొద్దిరోజుల ముందు సీఏఏ అమలు చేసి ఓట్ల చీల్చేలా ప్రణాళిక రచించిందని ఆరోపించింది కాంగ్రెస్​. సుప్రీం కోర్టు ఎలక్టోరల్​ బాండ్లపై కీలక తీర్పు ఇచ్చిన నేపథ్యంలో దాని దృష్టిని మరల్చడానికి సీఏఏ ప్రకటన చేశారని ఆ పార్టీ ప్రధాన కార్యదర్శి జైరాం రమేశ్​ పేర్కొన్నారు.

"సీఏఏ చట్టం ఆమోదం పొందిన తర్వాత నిబంధనలు రూపొందించడానికి మోదీ ప్రభుత్వం నాలుగేళ్ల మూడు నెలల సమయం తీసుకుంది. నిబంధనల వెల్లడికి సుమారు 9గడువు పెంపునకు అనుమతులు తీసుకుంది. సరిగ్గా ఎన్నికల ముందు ఓట్లను చీల్చేలా ప్రణాళిక రచించి ఇప్పుడు తీసుకువచ్చింది. ముఖ్యంగా బంగాల్​, అసోంలో ఓట్లను చీల్చేలా ఈ సమయాన్ని ఎంపిక చేసుకుంది."

--జైరాం రమేశ్​, కాంగ్రెస్ ప్రధాన కార్యదర్శి

నిబంధనలు పరిశీలించి స్పందిస్తాం : మమత
మొదటి నుంచి పౌరసత్వ సవరణ చట్టాన్ని తీవ్రంగా వ్యతిరేకిస్తున్న బంగాల్ ముఖ్యమంత్రి మమతా బెనర్జీ, ప్రజలపై వివక్ష చూపే విధంగా ఉంటే తాను అడ్డుకుంటానని చెప్పారు. బంగాల్​, ఈశాన్య రాష్ట్రాల్లో సీఏఏ సున్నితమైన అంశమని, ఎన్నికల ముందు అశాంతిని కోరుకోవడం లేదన్నారు. నిబంధనలను పరిశీలించిన తర్వాత ఈ అంశంపై పూర్తిగా మాట్లాడుతామని తెలిపారు.

'మత విభజనకు వ్యతిరేకం'
పౌరసత్వ సవరణ చట్టం మతాల మధ్య విభేదాలను సృష్టిస్తుందన్నారు కేరళ ముఖ్యమంత్రి పినరయి విజయన్​. ఈ చట్టం ముస్లింలను రెండో స్థాయి పౌరులుగా మారుస్తాయని, దీనిని రాష్ట్రంలో అమలు కాకుండా చూస్తామని స్పష్టం చేశారు. మతాల మధ్య విభజనకు వ్యతిరేకంగా కేరళ నిలబడుతుందని చెప్పారు. మరోవైపు సీఏఏ నిబంధనలను నోటిఫై చేస్తూ కేంద్రం నిర్ణయం తీసుకున్న నేపథ్యంలో దిల్లీలోని షహీన్​ బాగ్​, జామియా లాంటి సున్నిత ప్రాంతాల్లో పటిష్ఠ భద్రతను ఏర్పాటు చేశారు.

ముస్లింలే లక్ష్యంగా సీఏఏ
మరోవైపు సీఏఏ అమలుపై ఎక్స్‌లో స్పందించారు ఏఐఎంఐఎం అధినేత అసదుద్దీన్‌ ఒవైసీ. ఎన్నికలు రాగానే సీఏఏ నిబంధనలు వస్తాయని, వాటిపై తమకు అభ్యంతరాలున్నాయని చెప్పారు. మతం ఆధారంగా కాకుండా హింసకు గురైన వారికి ఆశ్రయం ఇవ్వాలని కోరారు. సీఏఏ నిబంధనలను ఐదేళ్లుగా ఎందుకు పెండింగ్‌ పెట్టారని, ఇప్పుడే ఎందుకు అమలు చేస్తున్నారో చెప్పాలని కేంద్రాన్ని ప్రశ్నించారు. ముస్లింలే లక్ష్యంగా సీఏఏ, ఎన్‌ఆర్‌సీ, ఎన్‌పీఆర్‌ తెచ్చారని ఆరోపించారు.

నాలుగేళ్ల తర్వాత అమలు
సార్వత్రిక ఎన్నికల ముందు కేంద్ర ప్రభుత్వం కీలక నిర్ణయం తీసుకుంది. వివాదాస్పదమైన పౌరసత్వ సవరణ చట్టం - 2019 CAAను నోటిఫై చేసింది. దీంతో నాలుగేళ్ల తర్వాత చట్టం అమల్లోకి వచ్చింది. CAA చట్టం 2019 డిసెంబరులో పార్లమెంట్‌ ఆమోదం పొందింది. రాష్ట్రపతి సమ్మతి కూడా లభించినా నిబంధనలు రూపొందించకపోవడం వల్ల ఇంతవరకు ఈ చట్టం అమల్లోకి రాలేదు. తాజాగా CAAని కేంద్రం అమల్లోకి తెచ్చింది.

• दिसंबर 2019 में संसद द्वारा पारित नागरिकता संशोधन अधिनियम के नियमों को अधिसूचित करने में मोदी सरकार को चार साल और तीन महीने लग गए। प्रधानमंत्री दावा करते हैं कि उनकी सरकार बिल्कुल प्रोफेशनल ढंग से और समयबद्ध तरीक़े से काम करती है। सीएए के नियमों को अधिसूचित करने में लिया गया इतना…

  — Jairam Ramesh (@Jairam_Ramesh) March 11, 2024

పౌరసత్వ సవరణ చట్టంపై అప్పట్లో దేశ వ్యాప్తంగా పెద్ద ఎత్తున నిరసనలు వెల్లువెత్తాయి. CAAను పార్లమెంట్‌లో ప్రవేశపెట్టిన సమయంలో తొలుత అసోంలో ఆందోళనలు ప్రారంభమయ్యాయి. చట్టం ఆమోదం పొందిన తర్వాత దేశవ్యాప్తంగా ప్రదర్శనలు తీవ్రమయ్యాయి. కొన్ని ప్రాంతాల్లో హింస కూడా చెలరేగింది. ఆ సమయంలో 100 మందికి పైగా ప్రాణాలు కోల్పోయారు. వేలాది మంది నిరసనకారులను పోలీసులు అదుపులోకి తీసుకున్నారు.