How To Make Hotel Style Mysore Bonda : మార్నింగ్ బ్రేక్ఫాస్ట్లో ఎక్కువ మంది ఇష్టపడే టిఫెన్స్లో మైసూర్ బోండా ఒకటి. బయట టిఫెన్ సెంటర్స్, హోటల్స్కి వెళ్లినప్పుడు వీటిని ఆస్వాదిస్తుంటారు. అయితే.. అక్కడ తిన్నప్పుడు అవి ఎంతో టేస్టీగా, సాఫ్ట్గా ఉంటాయి. కానీ, ఇంటి వద్ద ప్రిపేర్ చేసుకుంటే తేడా కొట్టేస్తుంది. మీక్కూడా ఇది అనుభవమేనా? అయితే.. మీకోసమే పక్కా కొలతలతో ఈజీగా తయారు చేసుకునేలా "మైసూర్ బోండా" రెసిపీ తీసుకొచ్చాం. రుచి హోటల్కు ఏమాత్రం తీసిపోవు! మరి.. ఎలా ప్రిపేర్ చేసుకోవాలో చూద్దామా?
కావాల్సిన పదార్థాలు :
- పెరుగు - ముప్పావు కప్పు(180 గ్రాములు)
- బేకింగ్ సోడా - ఒకటిన్నర టీస్పూన్
- మైదా - 3 కప్పులు(360 గ్రాములు)
- జీలకర్ర - 1 టీస్పూన్
- ఉప్పు - రుచికి తగినంత
- పచ్చిమిర్చి - కొద్దిగా
- అల్లం - 1 టేబుల్స్పూన్
- కొబ్బరి తురుము - 3 టీస్పూన్లు
- కరివేపాకు - 2 రెమ్మలు
- నూనె - వేయించడానికి తగినంత
తయారీ విధానం :
- ఇందుకోసం ముందుగా ఒక బౌల్లో పెరుగు(Curd), బేకింగ్ సోడా వేసుకొని బాగా కలుపుకోవాలి.
- ఆ తర్వాత అందులో జీలకర్ర, మైదా, రుచికి సరిపడా ఉప్పు వేసుకొని ముందుగా ఓసారి లైట్గా కలుపుకోవాలి. ఆపై తగినన్ని వాటర్ యాడ్ చేసుకుంటూ గడ్డలు లేకుండా మిశ్రమం మొత్తం బాగా కలిసేలా మిక్స్ చేసుకోవాలి.
- ఇక్కడ గుర్తుంచుకోవాల్సిన విషయమేమిటంటే.. పెరుగును ఏ కప్పుతో తీసుకున్నారో అదే కప్పుతో మైదాను తీసుకోవాలి.
- ఆ విధంగా మిక్స్ చేసుకున్నాక అరచేతి వేళ్లను స్ప్రెడ్ చేసి మిశ్రమాన్ని 4 నుంచి 5 నిమిషాల పాటు బాగా బీట్ చేయాలి. ఇలా చేయడం వల్ల పిండి లోపల గాలి ఏర్పడి బొండాలు సాఫ్ట్గా వస్తాయి.
- అనంతరం ఆ బౌల్పై మూతపెట్టి మిశ్రమాన్ని కనీసం నాలుగు గంటల పాటు నానబెట్టుకోవాలి.
- తర్వాత రెసిపీలోకి కావాల్సిన పచ్చిమిర్చిని సన్నగా కట్ చేసుకోవాలి. అలాగే అల్లం, కొబ్బరి, కరివేపాకును సన్నగా తురుముకోవాలి.
- నాలుగంటలయ్యాక పిండిని తీసుకొని అందులో ముందుగా కట్ చేసి పెట్టుకున్న పచ్చిమిర్చి, అల్లం, కొబ్బరి, కరివేపాకు తురుము వేసుకోవాలి. ఆపై మిశ్రమాన్ని మరోసారి 2 నుంచి 3 నిమిషాలపాటు బాగా బీట్ చేసుకోవాలి.
- అనంతరం స్టౌపైన కాస్త లోతుగా ఉన్న మూకుడు పెట్టుకొని వేయించడానికి తగినంత ఆయిల్ వేసుకొని హీట్ చేసుకోవాలి. నూనె బాగా కాగిందనుకున్నాక.. మంటను మీడియం ఫ్లేమ్లో ఉంచి చేతితో కొద్దిగా పిండిని తీసుకొని బోండాల మాదిరిగా వేసుకోవాలి.
- తర్వాత మంటను అడ్జస్ట్ చేసుకుంటూ బోండాలను ఎర్రగా వేయించుకోవాలి. అంతే.. సూపర్ టేస్టీగా ఉండే 'హోటల్ స్టైల్ మైసూర్ బోండాలు' రెడీ!
- ఆపై వాటిని ఒక ప్లేట్లోకి తీసుకొని పల్లీ చట్నీ లేదా ఇంకేదైనా పచ్చడితో తింటే రుచి అద్దిరిపోతుంది!
- అయితే, మీరు ప్రిపేర్ చేసుకున్న బోండాలు ఒకవేళ గట్టిగా వస్తున్నాయనుకుంటే తగినంత వంటసోడా వేసుకోలేదని గమనించాలి. అప్పుడు మళ్లీ కాస్త సోడా యాడ్ చేసుకొని బాగా కలుపుకొని బోండాలు వేసుకుంటే సరిపోతుంది.
ఇవీ చదవండి :
ఫ్రిడ్జ్‌లో పెట్టినా ఇడ్లీ/దోశ పిండి పులిసిపోతుందా ? - ఈ టిప్స్‌ పాటిస్తే సరి - పైగా టేస్టీ కూడా!
టిఫెన్ స్పెషల్ : "రాయలసీమ పల్లీ చట్నీ" - పదే పది నిమిషాల్లో రెడీ!
