Corruption Complaints Against Railway Employees : దేశంలో అవినీతి కేసులపై కేంద్ర విజిలెన్స్ కమిషన్-CVC ఆశ్చర్యకరమైన గణాంకాలను వెల్లడించింది. గత ఏడాది తమకు అందిన అవినీతి కేసుల్లో ఎక్కువ శాతం రైల్వే ఉద్యోగులపై ఉన్నాయని తెలిపింది. తర్వాత దిల్లీలోని స్థానిక సంస్థలు, ప్రభుత్వరంగ బ్యాంకులపై ఫిర్యాదులు అందాయంటూ CVC వార్షిక నివేదిక విడుదల చేసింది. గత ఏడాది అవినీతికి సంబంధించి 74,203 ఫిర్యాదులు అందగా వాటిలో 66,373 ఫిర్యాదులను పరిష్కరించామని, 7,830 పెండింగ్లో ఉన్నట్లు తెలిపింది. తమకు రైల్వే ఉద్యోగులపైనే ఏకంగా 10,447 ఫిర్యాదులు వచ్చాయని CVC వివరించింది.
| అవినీతిపై 2023లో సీవీసీకి వచ్చిన ఫిర్యాదులు | |
| మొత్తం ఫిర్యాదులు | 74, 203 |
| పరిష్కారమైనవి | 66, 373 |
| పెండింగ్ | 7, 830 |
| రైల్వే ఉద్యోగులు | 10, 447 |
| దిల్లీ స్థానిక సంస్థలు | 7, 665 |
| ప్రభుత్వ ఉద్యోగులు | 6, 638 |
| దిల్లీ పోలీసులు | 3, 325 |
| బొగ్గు శాఖ | 4, 420 |
| కార్మిక శాఖ | 3, 217 |
| అవినీతిపై 2023లో సీవీసీకి వచ్చిన ఫిర్యాదులు | |
| పెట్రోలియం శాఖ | 2, 749 |
| హోంశాఖ | 2, 309 |
| రక్షణ శాఖ | 1, 861 |
| సీబీడీటీ | 1, 828 |
| టెలీకమ్యూనికేషన్లు | 1, 457 |
దిల్లీ స్థానిక సంస్థలపై 7,665 ఫిర్యాదులు
దేశ రాజధాని ప్రాంతం-NCR మినహా దిల్లీలోని స్థానిక సంస్థలపై 7,665 ఫిర్యాదులు వచ్చినట్లు వెల్లడించింది. వాటిలో దిల్లీ పారిశ్రామిక, మౌలికవసతుల అభివృద్ధి కార్పొరేషన్, దిల్లీ జల్ బోర్డు, పర్యాటక, రవాణా అభివృద్ధి కార్పొరేషన్, రవాణా కార్పొరేషన్, దిల్లీ ట్రాన్స్‌కో, పవర్ జనరేషన్‌, మున్సిపల్ కార్పొరేషన్‌లో అవినీతిపై అనేక ఫిర్యాదులు అందినట్లు CVC వివరించింది. దిల్లీలో ప్రభుత్వ ఉద్యోగుల అవినీతిపై 6,638 ఫిర్యాదులు వచ్చాయని, దిల్లీ పోలీసులపై 3,325 ఫిర్యాదులు అందాయని తెలిపింది.
ప్రభుత్వరంగ బ్యాంకుల్లో పెద్దఎత్తున ఫిర్యాదులు!
ఇక, ప్రభుత్వరంగ బ్యాంకులపై 7,004 ఫిర్యాదులు రాగా 6,667 పరిష్కరించామని, 337 పెండింగ్లో ఉన్నట్లు తెలిపింది. కేంద్ర బొగ్గు శాఖ ఉద్యోగులపై 4,420, కేంద్ర కార్మిక శాఖ ఉద్యోగులపై 3,217 ఫిర్యాదులు వచ్చాయని CVC వెల్లడించింది. పెట్రోలియం శాఖ ఉద్యోగులపై 2,749, హోంశాఖ ఉద్యోగులపై 2,309, రక్షణ శాఖ ఉద్యోగులపై 1,861 ఫిర్యాదులు వచ్చాయని తెలిపింది. కేంద్ర ప్రత్యక్ష పన్నుల బోర్డు ఉద్యోగులపై 18,28, టెలీకమ్యూనికేషన్ల విభాగం ఉద్యోగులపై 14,57 ఫిర్యాదులు వచ్చాయని, కేంద్ర పరోక్ష పన్నులు, కస్టమ్స్‌ బోర్డు ఉద్యోగులపై 1205 ఫిర్యాదులు అందాయన వివరించింది. మరికొన్ని ప్రభుత్వ విభాగాల ఉద్యోగులపైనా ఫిర్యాదులు వచ్చినట్లు తెలిపింది.
| ప్రభుత్వరంగ బ్యాంకులపై ఫిర్యాదులు | |
| మొత్తం ఫిర్యాదులు | 7, 004 |
| పరిష్కారమైనవి | 6, 667 |
| పెండింగ్లో ఉన్నవి | 337 |
మరోవైపు, CBI దర్యాప్తు చేస్తున్న 6,900 కేసులు వివిధ కోర్టుల్లో పెండింగ్లో ఉన్నట్లు CVC తన వార్షిక నివేదికలో వెల్లడించింది. ఇందులో 361 కేసులు 20 ఏళ్లకుపైగా పెండింగ్లో ఉన్నట్లు వివరించింది.2వేల 461 కేసుల్లో విచారణ పదేళ్లు దాటిపోయిందన్న CVC ఇది ఆందోళనకరమని పేర్కొంది. వివిధ కోర్టుల్లో పెండింగ్లో ఉన్న కేసుల పూర్తి వివరాల కోసం ఈ లింక్పై క్లింక్ చేయండి.
