Lok Sabha Elections Amitabh Bachchan : ప్రస్తుతం రాజకీయాలకు దూరంగా ఉన్న బాలీవుడ్ సూపర్ స్టార్ అమితాబ్ బచ్చన్, ఇప్పటికు ఒక్కసారే ఎన్నికల్లో పోటీ చేసి భారీ మెజార్టీతో గెలిచారు. కాంగ్రెస్ అభ్యర్థిగా 1984లో ప్రయాగ్రాజ్ నుంచి ఎన్నికల బరిలోకి దిగారు. ఆయనపై భారతీయ లోక్దళ్ సీనియర్ నేత హేమవతి నందన్ బహుగుణ పోటీ చేశారు. ఆ సమయంలో బిగ్ బి ప్రచారం నుంచి మొదలుకుని ఓటింగ్ వరకు ఎన్నో విచిత్ర ఘటనలు జరిగాయి.
1984లో ప్రధాని ఇందిరాగాంధీ హత్య తర్వాత దేశంలో లోక్‌సభ ఎన్నికలు జరిగాయి. ఈ ఎన్నికల్లో కాంగ్రెస్ పార్టీ బాధ్యత అంతా రాజీవ్గాంధీ భుజస్కంధాలపైనే ఉంది. తన బలమైన ప్రత్యర్థి హేమవతి నందన్ బహుగుణపై రాజకీయ ప్రతీకారం తీర్చుకోవాల్సి వచ్చింది. రాజీవ్ హత్యతో ప్రజల సానుభూతి కాంగ్రెస్‌పై ఉంది. ఈ ఎన్నికల్లో ఎలాగైనా కాంగ్రెస్ పార్టీని భారీ మెజార్టీతో గెలిపించాలని రాజీవ్ గాంధీ తీవ్ర ప్రయత్నాలు చేశారు.
అప్పటికే అమితాబ్ బచ్చన్ ఎన్నో సూపర్ హిట్ సినిమాలను అందిస్తూ బాలీవుడ్ ఇండస్ట్రీలో సూపర్ స్టార్గా రాణిస్తున్నారు. రాజీవ్ గాంధీకి అమితాబ్ స్నేహితుడు కావడం వల్ల ఎన్నికల్లో పోటీ చేయాలని రాజీవ్ పట్టుబట్టారు. దీంతో అమితాబ్ ఉత్తర్ప్రదేశ్లోని ప్రయాగ్రాజ్ నుంచి ఎన్నికల్లో పోటీ చేసేందుకు అంగీకరించారు.
'లవ్ యూ అమితాబ్జీ' అంటూ చున్నీల విసుర్లు!
అయితే ఎన్నికల ప్రచారంలో భాగంగా అమితాబ్ బచ్చన్ కొన్ని ప్రాంతాల్లో తిరుగుతున్న సమయంలో ఆయనకు అమ్మాయిలు, మహిళలు డప్పులు కొడుతూ స్వాగతం పలికేవారు. బిగ్ బీ ఎక్కడికి వెళ్లినా 'లవ్ యూ అమితాబ్ జీ' అంటూ అమ్మాయిలు గుంపులు గుంపులుగా అమితాబ్ను ఫాలో అయ్యేవారు. అమితాబ్పై తమ చున్నీలను విసురుతూ రచ్చరచ్చ చేసేవారు.
సిగ్గుపడ్డ అమితాబ్!
అమితాబ్ ప్రత్యర్థి హేమవని నందన్ బహుగుణ బలమైన రాజకీయ నాయకురాలు. ఆమెను ఓడించడం అంత సులువు కాదు. అయినప్పటికీ ప్రయాగ్రాజ్ వీధుల్లో అమితాబ్ బచ్చన్ ఎక్కడికి వెళ్లినా, ప్రజలు ఆయన వెంట పరుగులు తీసేవారు. క్రమంగా బిగ్ బి సభలకు యువతతో పాటు మహిళలు భారీగా తరలివచ్చేవారు. ఈ సమయంలో అమితాబ్ బచ్చన్ తన సతీమణి జయా బచ్చన్‌తో కలిసి ప్రచారం కూడా చేశారు. అయితే చాలాసార్లు ప్రచారం సమయంలో అభిమానుల వింత చేష్టలు చూసి అమితాబ్ సిగ్గుపడాల్సి వచ్చింది.
బ్యాలెట్‌లపై లిప్స్టిక్ గుర్తులు!
ఇక పోలింగ్ రోజు ప్రయాగ్రాజ్ ప్రజలు ఉత్సాహంగా ఓట్లు వేశారు. ఓట్ల లెక్కింపు ప్రారంభం కాగానే బ్యాలెట్‌పై అమితాబ్‌కు వచ్చిన ఓట్లతో పాటు లిప్స్టిక్ గుర్తులు కూడా కనిపించాయి. కౌంటింగ్ కొనసాగుతున్న కొద్దీ లిప్స్టిక్ గుర్తులతో కూడిన బ్యాలెట్ల సంఖ్య వేగంగా పెరగడం ప్రారంభమైంది. అమితాబ్‌కు ఓటుతో పాటు లిప్స్టిక్ గుర్తులు కూడా ఉన్నటు వంటి దాదాపు 4000 బ్యాలెట్ పేపర్లు వచ్చాయి. చివరకు ఈ నాలుగు వేల ఓట్లను ఎన్నికల సంఘం రద్దు చేసింది.
కాగా, ఈ ఎన్నికల్లో అమితాబ్‌కు 2,97,461 ఓట్లు వచ్చాయి. ఆయన ప్రత్యర్థి భారతీయ లోక్దళ్ అభ్యర్థి హేమవతి నందన్ బహుగుణకు కేవలం 1,09,666 ఓట్లు వచ్చాయి. అమితాబ్ బచ్చన్ 1,87,795 ఓట్లతో గెలుపొందారు. అయితే ఐదేళ్ల పదవీ కాలం పూర్తి కాకుండానే అమితాబ్ బచ్చన్ రాజకీయాలకు దూరమయ్యారు.
