జేపీ మోర్గాన్​ వైస్​ ప్రెసిడెంట్​కు తప్పని కులవివక్ష- ఫ్లాట్​ కొనుగోలు చేసేందుకు వెళ్తే నో!

JP Morgan Vp On Caste Discrimination : గుజరాత్​లోని ఇంటిని కొనుగోలు చేసే క్రమంలో తాను ఎదుర్కొన్న కుల వివక్షత గురించి జేపీ మోర్గాన్​ వైస్​ ప్రెసిడెంట్ అనిరుధ్ కేజ్రీవాల్ ఎక్స్​ వేదికగా పంచుకున్నారు. ఈ ట్వీట్​ను గుజరాత్​ ముఖ్యమంత్రి, పోలీసులకు ట్యాగ్​ చేశారు.

JP Morgan Vp On Caste Discrimination : గుజరాత్​ గాంధీనగర్​లో ఇల్లును కొనుగోలు చేసే క్రమంలో కులవివక్షతను ఎదుర్కొన్నానని జేపీ మోర్గాన్ వైస్ ​ప్రెసిడెంట్ అనిరుధ్​ సోషల్ ​మీడియా ఎక్స్​ వేదికగా చేసిన ట్వీట్​ వైరల్​గా మారింది. ఆయన తన ట్వీట్​ను గుజరాత్ ముఖ్యమంత్రితో పాటు రాష్ట్ర పోలీసులు, గుజరాత్ బీజేపీకి ట్యాగ్​ చేశారు. దీనిపై స్పందించిన నెటిజన్లు బాధ్యులపై చర్యలు తీసుకోవాలని కోరారు.

'ముంబయిలో కొంత కాలం నివసించిన తర్వాత సింగపూర్​లో ఉండే అవకాశాన్ని పక్కన పెట్టి గుజరాత్​ వెళ్లాలని నిర్ణయించుకున్నాను. గిఫ్ట్​సిటీ, ప్రధాని మోదీ దార్శనికత పట్ల నేను ఆకర్షితుడిని అయ్యాను. దీని నుంచి స్ఫూర్తిని పొంది గుజరాత్​లో ఇంటిని కొనుగోలు చేయాలనే ఆలోచనకు ముందడుగు వేసేలా చేసింది. అయితే ఆ ఉత్సుకత గుండె చలించిపోయేలా చేసింది' అని జేపీ మోర్గాన్ వైస్​ ప్రెసిడెంట్ అనిరుధ్ కేజ్రీవాల్ ట్వీట్ చేశారు.

• Shocked to face blatant caste discrimination in Sant Vihar 1 Society, Gandhinagar, Gujarat. My attempt to buy a flat turned into a nightmare as society's management is barring my entry due to caste. #Gandhinagar #Gujarat #CasteDiscrimination @GujaratPolice @CMOGuj…

  — Anirudh Kejriwal (@AnirudhKejriwal) February 24, 2024

'కుల వివక్షతను ఎదుర్కొన్నాను'
గుజరాత్​లోని సంత్​ విహార్ ఒకటో సొసైటీలో తాను కులవివక్షత ఎదుర్కొన్నట్లు ఆరోపించారు. తాను నగరంలో అపార్ట్​మెంట్​ను కొనుగోలు చేయాలనుకుంటున్నప్పుడు సొసైటీ మేనేజ్​మెంట్ కులం కారణంగా తిరస్కరించిందని ఆరోపించారు. ఆ సంస్థ ఛైర్మన్​, మేనేజ్​మెంట్ బహిరంగంగా ఇతర కులాలకు చెందిన వారు ఫ్లాట్లు కొనుగోలు చేయడానికి వీలు లేదని వారు నిర్ణయించారని ఆరోపించారు. తన హక్కులను తిరిగి పొందేందుకు న్యాయపరమైన చర్యలు తీసుకోవాలనుకుంటున్నట్లు జేపీ మోర్గాన్ వైస్​ ప్రెసిడెంట్​ తెలిపారు. 'దాదాపు 30 మంది గుమిగూడడం వల్ల పరిస్థితి మరింత దారుణంగా తయారయ్యింది. ఒకవేళ నేను ఫ్లాట్​ను కొనుగోలు చేసేందుకు ముందుకు సాగితే తీవ్ర పరిమాణామాలు ఎదుర్కోవాల్సి ఉంటుందని బెదిరించారు' అని అనిరుధ్​ తెలిపారు.

'ఈ అనుభవం పీడ కల కంటే తక్కువేం కాదు'
'ఈ అనుభవం పీడకల కంటే తక్కువేం కాదు. నేను ఎంతో ఆశతో ఎంచుకున్న ప్రదేశంతో ఇలాంటి బహిరంగ కులతత్వాన్ని ఎదుర్కొన్న బాధ వర్ణనాతీతం' అని అనిరుధ్​ కేజ్రీవాల్ ట్విట్టర్​లో రాశారు. ఈ పోస్టు సోషల్​ మీడియాలో వైరల్​గా మారింది. చాలా మంది వినియోగదారులు అతనికి మద్ధతుగా ముందుకు వచ్చారు. సొసైటీ యాజమాన్యం అలాంటి దురాఘతాలకు పాల్పడినందుకు బాధ్యులపై కఠిన చర్యలు తీసుకోవాలని నెటిజన్లు కోరారు.