Japan Girl Performed Kalbelia Dance : ఓ సినిమాలో చూసిన డ్యాన్స్ను నేర్చుకునేందుకు 11 ఏళ్ల క్రితం భారత్కు వచ్చిన జపాన్ యువతి ఆ కళలో ప్రావీణ్యం సంపాదించి తమ దేశస్థులకు నేర్పించే స్థాయికి చేరుకుంది. జపాన్కు చెందిన మయూమి అలియాస్ మధు కల్బెలియా నృత్యం నేర్చుకునేందుకు 2013లో రాజస్థాన్కు వచ్చింది. డ్యాన్స్తో పాటు జానపద గీతాలను కూడా పాడటం నేర్చుకుంది. తిరిగి తన దేశానికి వెళ్లి అక్కడి వాళ్లకు కూడా ఈ నృత్యాన్ని, సంగీతాన్ని నేర్పిస్తోంది.
మధు 2013లో రాజస్థాన్లోని జోధ్పుర్కు చెందిన ఆశా సపేరా అనే కళాకారిణి దగ్గర శిక్షణ తీసుకునేందుకు వచ్చింది. భారత సంస్కృతికి ముగ్ధురాలై తన పేరును మధుగా మార్చుకుంది. ఆ తర్వాతి నుంచి రాజస్థాన్కు వచ్చినప్పుడల్లా నృత్యంతో పాటు జానపద పాటలు పాడటం నేర్చుకుంటూ ఉండేది. వాటిని వీడియో తీసి జపాన్కు వెళ్లిన తర్వాత స్వయంగా ప్రాక్టీస్ చేస్తుండేది. అలా 2015 నాటికి కల్బెలియా డ్యాన్స్ను పూర్తిగా నేర్చుకుంది.
జపాన్ విద్యార్థులకు శిక్షణ
రాజస్థాన్ను తనకు రెండో ఇల్లు అని అంటోంది మధు. కల్బెలియా డ్యాన్స్తోపాటు ఘూమర్ నృత్యం, మార్వాడీ పాటలు, రాజస్థానీ జానపద గీతాలు నేర్చుకుంది. జపాన్లోని భారత రాయబార కార్యలయంలో నిర్వహించిన వివిధ కార్యక్రమాల్లో ప్రదర్శనలు ఇచ్చింది మధు. అలాగే ప్రతి ఆదివారం టోక్యోలోని విద్యార్థులకు నృత్యంతో పాటు రాజస్థానీ పాటలు పాటడం నేర్పుతోంది. ప్రస్తుతం తన దగ్గర 20 మంది విద్యార్థులు ఈ రాజస్థానీ కళను నేర్చుకున్నట్లు మధు తెలిపింది.
"కల్బెలియా నృత్యంతో పాటు మార్వాడీ పాటలు పాడటం నేర్చుకున్నాను. అలానే స్టూడెంట్స్కు మార్వాడీ పాటలను పాటడం నేర్పిస్తున్నాను. వాళ్లు ఈ పాటలను నేర్చుకునేందుకు చాలా ఆసక్తిగా ఉన్నారు. అలానే లిరిక్స్ రాయటం కూడా నేర్పిస్తున్నాను."
- మధు, కల్బెలియా నృత్య కళాకారిణి
ఇటీవలే జైపుర్లో రిఫ్ ఫిల్మ్ క్లబ్ నిర్వహించిన రాజస్థాన్ ఇంటర్నేషనల్ ఫిల్మ్ ఫెస్టివల్ పదో ఎడిషన్లోనూ తన ప్రదర్శనతో ఆకట్టుకుంది మధు. రాజ్పుతి ఘూమర్ నృత్యాన్ని ప్రదర్శించి ప్రశంసలు అందుకుంది.
