సండే స్పెషల్​ - నోరూరించే ప్రాన్స్​ బిర్యానీ! ఇలా చేశారంటే మళ్లీ మళ్లీ తినడం పక్కా! - Tasty and Spicy Prawns Biryani

Prawns Biryani Making Process: మీకు ప్రాన్స్​ అంటే ఇష్టమా? వాటితో చేసిన వంటలు ఏవైనా ఓ పట్టు పడతారా? మరి లేట్​ చేయకుండా ప్రాన్స్​ బిర్యానీ ట్రై చేయండి. మాకు రాదు అంటారా? నో టెన్షన్​.. మేము చెప్పే ఈ పద్ధతి ఫాలో అయితే స్పైసీ అండ్​ టేస్టీ బిర్యానీ రెడీ అయినట్లే!!

How to Make Tasty and Spicy Prawns Biryani: హ్యపీ అకేషన్​ ఏదైనా నాన్​వెజ్​ ప్రియులకు బిర్యానీ అంటే కుసంత మక్కువ ఎక్కువే. ఇక బిర్యానీ లవర్స్​ సంగతి చెప్పక్కర్లేదు. కొత్తిమీర, పుదీనా పరిమళాలు.. కమ్మని నెయ్యి సువాసనలు.. మత్తెక్కించే మసాలాలు.. ఘుమఘుమలాడే రుచులతో... వావ్‌ అనిపించే బిర్యానీలను ఎంతో ఇష్టంగా తింటారు. ఇక బిర్యానీలు అంటే ఎక్కువ మందికి చికెన్​, మటన్​ మాత్రమే గుర్తొస్తాయి. కేవలం అవి మాత్రమే కాదండోయ్​.. నోరూరించే ప్రాన్స్‌ బిర్యానీ కూడా ఉంది. ఒక్కసారి ట్రై చేయండి.. మళ్లీ మళ్లీ చేసుకుని తినాలనిపించేంతా రుచిగా ఉంటుంది. మరి రొయ్యల బిర్యానీకి కావాల్సిన పదార్థాలు, తయారీ విధానం ఈ స్టోరీలో చూద్దాం..

ప్రాన్స్​ బిర్యానీకి కావాల్సిన పదార్థాలు:

• బాస్మతి బియ్యం- కప్పున్నర
• రొయ్యలు- రెండు కప్పులు
• అనాస పువ్వు- ఒకటి
• లవంగాలు- మూడు
• మిరియాలు- నాలుగు
• బిర్యానీ ఆకులు- రెండు
• ఉప్పు- తగినంత
• నిమ్మరసం- రెండు చెంచాలు
• పచ్చి కొబ్బరి తురుము- నాలుగు చెంచాలు
• పచ్చిమిర్చి- మూడు
• పుదీనా తురుము- రెండు పెద్ద చెంచాలు
• అల్లంముక్కలు, వెల్లుల్లి రెబ్బలు- నాలుగు చొప్పున,
• కొత్తిమీర-కొద్దిగా
• నెయ్యి- అరకప్పు
• ఉల్లిపాయలు- 3 (సన్నగా తరుముకోవాలి)
• కుంకుమపువ్వు పాలు- రెండు చెంచాలు
• సన్నగా కట్​ చేసిన అల్లం ముక్కలు- కొన్ని
• గరంమసాలా - ఒక స్పూన్​

తయారీ విధానం:

• ముందుగా బాస్మతి బియ్యాన్ని కడిగి పెట్టుకోవాలి. సన్నగా తరిగిన ఉల్లిపాయలను నూనెలో ఎర్రగా వేయించుకుని పక్కకు పెట్టుకోవాలి.
• ఇప్పుడు స్టౌ మీద గిన్నె పెట్టి సరిపడా నీళ్లు పోసి అవి వేడయ్యాక అందులో బాస్మతి బియ్యం, అనాస పువ్వు, లవంగాలు, మిరియాలు, బిర్యానీ ఆకులు, గరం మసాలా, కొద్దిగా ఉప్పు వేసి ఉడికించాలి.
• మరొక గిన్నెలో రొయ్యలు, నిమ్మరసం, ఉప్పు వేసి కలిపి పెట్టుకోవాలి.
• మిక్సీ జార్​ తీసుకుని పచ్చికొబ్బరి తురుము, పచ్చి మిరపకాయలు, పుదీనా, కొత్తిమీర, అల్లం, వెల్లుల్లి ముక్కలు వేసి కాసిన్ని నీళ్లు పోసి మెత్తగా బ్లెండ్‌ చేసుకోవాలి.
• ఈ మిశ్రమాన్ని ఓ పెద్ద గిన్నెలోకి తీసుకోవాలి. ఇందులోనే రొయ్యలు, వేయించిన ఉల్లిపాయ ముక్కలను కొన్ని వేసి కలపాలి.
• ముప్పావు వంతు ఉడికిన అన్నాన్ని నీళ్లు పారబోసి చిల్లుల గిన్నెలో వేసి పక్కన పెట్టుకోవాలి.
• ఇప్పుడు ఓ పెద్ద గిన్నె తీసుకుని నెయ్యి వేసి ఉడికించిన అన్నాన్ని పొరలా వేయాలి. దీనిపై రొయ్యల మిశ్రమాన్ని లేయర్‌లా వేసుకోవాలి. వీటిపై మళ్లీ అన్నం, వేయించిన ఉల్లిపాయలు, సన్నగా చీల్చిన అల్లం ముక్కలు వేసుకోవాలి.
• దీనిపై మళ్లీ రొయ్యల మిశ్రమాన్ని వేయాలి. చివరగా మిగిలిన అన్నాన్ని వేసి.. దీనిపై వేయించిన ఉల్లిపాయ ముక్కలు, అల్లం ముక్కలు, కాస్తంత నెయ్యి, కుంకుమపువ్వు పాలు, పుదీనా వేసి మూత పెట్టేయాలి.
• ఇప్పుడు స్టౌ వెలిగించి దీన్ని ఇరవై నిమిషాలు ఉడికించాలి. ఆ తర్వాత స్టవ్​ ఆఫ్​ చేసి మరో ఇరవై నిమిషాలు గిన్నెను అలాగే ఉంచాలి. అందులోని ఆవిరికి రొయ్యలు పూర్తిగా ఉడికిపోతాయి.
• అంతే ఎంతో రుచికరమైన ప్రాన్స్​ బిర్యానీ రెడీ..!