Himachal Teacher Job Notification : హిమాచల్ప్రదేశ్లోని ఓ గవర్నమెంట్ హైస్కూల్ ఇచ్చిన టీచర్ జాబ్ నోటిఫికేషన్ ఇప్పుడు సోషల్ మీడియాలో తెగ వైరల్ అవుతోంది. అందులో టీచర్ కంటే వాచ్మెన్ ఉద్యోగానికే ఎక్కువ జీతం ఉంది. దీంతో అంతా ఓ నోటిఫికేషన్ కోసమే మాట్లాడుకుంటున్నారు! అసలు విషయమేమింటంటే?
పార్ట్ టైమ్ టీచర్, వాచ్మెన్ ఉద్యోగాల కోసం చంబా జిల్లాలోని భర్మోర్ హైస్కూల్ నోటిఫికేషన్ను విడుదల చేసింది. ఆ ప్రకటనలో పార్ట్టైమ్ ఉపాధ్యాయుడికి విద్యార్హత బీఎస్సీ/ఎమ్స్సీ బీఈడీ, టెట్, అదే వాచ్మెన్కు పదోతరగతిగా పేర్కొంది. అయితే వాచ్మెన్ కంటే టీచర్కు ఇచ్చే జీతమే తక్కువగా ఉంది. పార్ట్టైమ్ టీచరుకు రూ.8,450 కాగా, వాచ్మెన్ రూ.10,630గా ఉంది. రెండు పోస్టులకు అక్టోబరు 20న ఇంటర్వ్యూలు నిర్వహిస్తామని ప్రకటనలో తెలిపింది.
అయితే రాష్ట్ర విద్యాశాఖ ఆధ్వర్యంలో జరుగుతున్న ఆ రిక్రూట్మెంట్ ప్రకటనను చూసి నెటిజన్లు ఆశ్చర్యపోతున్నారు. సోషల్ మీడియాలో పాఠశాల యాజమాన్యాన్ని విమర్శిస్తున్నారు. కొందరు ఆగ్రహం వ్యక్తం చేస్తుంటే మరికొందరు టీచర్ కంటే వాచ్మెన్ ఉద్యోగమే బెస్ట్ అనుకుంటా అని సరదాగా కామెంట్స్ పెడుతున్నారు.
మరోవైపు, సోషల్ మీడియాలో వస్తున్న వార్తలపై భర్మోర్ హైస్కూల్ ప్రధాన ఉపాధ్యాయుడు స్పందించారు. పాఠశాల పరిధిలోని కస్తూర్భా గాంధీ హాస్టల్లో బాలికలకు ఉదయం, సాయంత్రం ఒక గంట చొప్పున బోధించడానికి పార్ట్టైమ్గా ఉపాధ్యాయుడిని నియమించేందుకు నోటిఫికేషన్ ఇచ్చామని అన్నారు. అదే వాచ్మెన్కు ఫుల్టైమ్ డ్యూటీ ఉంటుందని, అదే విషయాన్ని ప్రకటనలో స్పష్టంగా వివరణ ఇచ్చినట్లు పేర్కొన్నారు.
