'లీటర్​ పెట్రోల్ రూ. 75, డీజిల్​ రూ.65- టోల్​గేట్ ఫీజు ఉండదు' డీఎంకే మేనిఫెస్టో రిలీజ్​

DMK Election Manifesto : తమిళనాడులో అధికార డీఎంకే పార్టీ లోక్‌సభ ఎన్నికల మేనిఫెస్టోను విడుదల చేసింది. మేనిఫెస్టోతో పాటు లోకసభ అభ్యర్థుల జాబితాను కూడా విడుదల చేసింది.

DMK Election Manifesto : తమిళనాడులో సీఎం స్టాలిన్‌ నేతృత్వంలోని డీఎంకే లోక్‌సభ ఎన్నికల మేనిఫెస్టోను విడుదల చేసింది. లీటర్​ పెట్రోల్, డీజిల్​ ధరలను రూ. 75, రూ.65కు తగ్గిస్తామని హామీ ఇచ్చింది. అలాగే జాతీయ రహదారులపై ఉన్న టోల్​గేట్​లను పూర్తిగా తొలగిస్తామని ప్రకటించింది. మేనిఫెస్టోతో పాటు లోక్​సభ అభ్యర్థుల జాబితాను కూడా విడుదల చేసింది.

'ఆర్టికల్ 361 రద్దు చేస్తాం'
దేశంలో ప్రతి మహిళలకు నెలకు రూ.1000 ఇస్తామని మేనిఫెస్టోలో డీఎంకే పేర్కొంది. గవర్నర్ల నియామకానికి సంబంధించి రాష్ట్రాలను సంప్రదించి చర్చలు జరుపుతామని చెప్పింది. గవర్నర్లకు చట్టపరమైన మినహాయింపులు ఇచ్చే ఆర్టికల్​ 361ను రద్దు చేస్తామని హామీ ఇచ్చింది. పుదుచ్చేరికి రాష్ట్ర హోదాను తొలగించే అధికారాన్ని కేంద్రానికి కల్పించే ఆర్టికల్‌ 356 రద్దుపై పోరాడుతామని పేర్కొంది. రైతులకు కనీస మద్దతు ధర నిర్ణయిస్తామని మేనిఫెస్టోలో తెలిపింది. జాతీయ విద్యావిధానాన్ని నీట్‌ పరీక్ష, ఉమ్మడి పౌరస్మృతి, పౌరసత్వ సవరణ చట్టాలను తమిళనాడులో అమలు చేయమని మేనిఫెస్టోలో వెల్లడించింది.

లోకసభ అభ్యర్థుల జాబితా
మేనిఫెస్టోతో పాటు 21 లోక్‌సభ స్థానాల్లో అభ్యర్థులను ఖరారు చేస్తూ జాబితా విడుదల చేసింది. సిట్టింగ్‌ ఎంపీలైన కనిమొళి, టీఆర్‌ బాలు, ఎ రాజాలకు మరోసారి అభ్యర్థిత్వం ఖరారు చేసింది. మిగిలిన 18సీట్లను మిత్రపక్షాలు అయిన కాంగ్రెస్‌, వామపక్షాలు, వీసీకే తదితర పార్టీలకు కేటాయించింది. కాంగ్రెస్‌ 9 స్థానాల్లో బరిలోకి దిగనుంది. 21 మంది అభ్యర్థుల్లో 11 మంది కొత్తవారే ఉన్నారు.

అన్నాడీఎంకే లిస్ట్ రిలీజ్​
AIADMK Candidate List : మరోవైపు అన్నాడీఎంకే పార్టీ 16 మంది అభ్యర్థులను ఖరారు చేస్తూ తొలి జాబితాను ప్రకటించింది. పార్టీ ప్రధాన కార్యదర్శి, మాజీ ముఖ్యమంత్రి ఎడప్పాడి పళనిస్వామి ఈ జాబితా విడుదల చేశారు. పొత్తులో భాగంగా 5 లోక్‌సభ స్థానాలను డీఎండీకేకు కేటాయించినట్లు ఆయన చెప్పారు. పుతియ తమిళగం, ఎస్​డీపీఐ పార్టీలకు ఒక్కో స్థానాన్ని ఇచ్చినట్లు వివరించారు. తమిళనాడులో మొత్తం 39 లోక్‌సభ స్థానాలు ఉన్నాయి. 2014లో అన్నాడీఎంకే ఏకంగా 38 స్థానాలను కైవసం చేసుకుని జయకేతనం ఎగరవేసింది. ఐతే 2019 ఎన్నికల్లో స్టాలిన్‌ నేతృత్వంలోని డీఎంకే, కాంగ్రెస్‌ సహా పలు పార్టీలతో పొత్తుపెట్టుకుని 38 స్థానాలను సొంతం చేసుకుంది. తాజా ఎన్నికలకు ఏప్రిల్‌ 19న ఒకే విడతలో పోలింగ్‌ జరగనుంది. జూన్‌ 4న ఫలితాలు వెల్లడికానున్నాయి.