ଶୁଭ୍ରା ହେଲେ ରାୟଗଡା ପୌର ଉପାଧ୍ୟକ୍ଷା

ରାୟଗଡ଼ା: ସମସ୍ତ କଳ୍ପନା ଜଳ୍ପନାର ଅବସାନ ଘଟାଇ ଶୁଭ୍ରା ପଣ୍ଡା ରାୟଗଡ଼ା ପୌର ପରିଷଦର ନୂତନ ଉପାଧ୍ୟକ୍ଷା ହୋଇଛନ୍ତି । ୩ ନମ୍ବର ୱାର୍ଡ଼ର କାଉନସିଲର ଭାବେ ବିଜୟୀ ହୋଇଥିବା ଶୁଭ୍ରା ବିଜେଡ଼ିର ଏକମାତ୍ର ପ୍ରାର୍ଥିନୀ ଭାବେ ନାମାଙ୍କନ ଦାଖଲ କରିଥିଲେ । ଅନ୍ୟ କୌଣସି କାଉନସିଲର ନାମାଙ୍କନ ଦାଖଲ କରିନଥିବାରୁ ଶୁଭ୍ରା ନିର୍ଦ୍ବନ୍ଦ୍ବରେ ନିର୍ବାଚିତ ହୋଇଛନ୍ତି । ଶୁଭ୍ରା ନିର୍ବାଚିତ ହେବାପରେ ବିଜେଡ଼ି ମହଲରେ ଖୁସିର ଲହରି ଖେଳିଯାଇଛି । ଆଉ ଗତ ୩୦ ତାରିଖ ପରଠାରୁ ଯେଉଁ ଛକାପଞ୍ଝା ଲାଗିରହିଥିଲା ସେଥିରେ ଯବନିକା ପଡ଼ିଛି । ଆଜି ସକାଳ ୧୦ ଟା ସମୟରେ ପୌର କାର୍ଯ୍ୟାଳୟର ସମ୍ମିଳନୀ କକ୍ଷରେ ଉପାଧ୍ୟକ୍ଷା ପଦବୀ ପାଇଁ ନିର୍ବାଚନ ଅନୁଷ୍ଠିତ ହୋଇଥିଲା । ରାଜ୍ୟ ବିଜେଡ଼ି କାର୍ଯ୍ୟାଳୟ ପକ୍ଷରୁ ଯେଉଁ ନାମ ଓ ହ୍ବିପ ବନ୍ଦ ଲଫାପାରେ ପଠାଯାଇଥିଲା ତାହାକୁ ଜିଲ୍ଲା ବିଜେଡ଼ି ପର୍ଯ୍ୟବେକ୍ଷକ ଅତନୁ ସବ୍ୟସାଚୀ ନାୟକ ସମସ୍ତ କାଉନସିଲରଙ୍କ ଉପସ୍ଥିତିରେ ଖୋଲିଥିଲେ । ଲଫାପାରେ ଦଳର ସଭାପତି ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଦସ୍ତଖତରେ ରହିଥିବା ପତ୍ରରେ ଶୁଭ୍ରାଙ୍କ ନାମକୁ ମୋହର ଦିଆଯାଇଥିଲା । ଶୁଭ୍ରା ଉପାଧ୍ୟକ୍ଷା ନିର୍ବାଚିତ ହେବାପରେ ରାଜ୍ୟସଭା ସାଂସଦ ଏନ.ଭାସ୍କର ରାଓ, ଅଧ୍ୟକ୍ଷ ପି.ମହେଶ ପଟ୍ଟନାୟକଙ୍କ ସମେତ ଦଳର ସମସ୍ତ ନେତା ତାଙ୍କୁ ଶୁଭେଚ୍ଛା ଜ୍ଞାପନ କରିଥିଲେ । ରାୟଗଡ଼ାରୁ ରଞ୍ଜନ କୁମାର ରଥ, ଇଟିଭି ଭାରତ