ନୟାଗଡ଼ରେ ସବୁଠୁ ଅଧିକ ପ୍ରଭାବିତ ମଣିପୁର ଗାଁ, ସ୍ଥିତି ପରଖିଲା ଇଟିଭି ଭାରତ

ନୟାଗଡ଼ ଜିଲ୍ଲାର ଭାପୁର ବ୍ଲକ ମଣିପୁର ଗାଁ ବନ୍ୟାରେ ସର୍ବାଧିକ ପ୍ରଭାବିତ ହୋଇଛି । ଜଳାର୍ଣ୍ଣବ ଗାଁକୁ ଯାଇ ଲୋକଙ୍କ ସହ ଆଲୋଚନା କରିଛି ଇଟିଭି ଭାରତ ଟିମ । ନୟାଗଡ଼ ମଣିପୁର ଗାଁ ଲୋକେ ବାହ୍ୟ ଜଗତରୁ ବିଚ୍ଛିନ୍ନ ହୋଇପଡ଼ିଥିବାବେଳେ, ଚାରିପଟେ ପାଣି ଘେରି ରହିଛି । ଲୋକେ ଛାତ ଉପରେ ଆଶ୍ରୟ ନେଇଛନ୍ତି । ବାହାରକୁ ଯାଇ ଗାଁକୁ ଆସିବା ଏବଂ ବାହାରୁ ଗାଁକୁ ଆସିବାକୁ ହେଲେ ବୋଟ ହିଁ ଏକମାତ୍ର ମାଧ୍ୟମ ସାଜିଛି । ପ୍ରଶାସନ ପକ୍ଷରୁ ରିଲିଫ ଯୋଗାଇ ଦିଆଯାଉଛି । ତଥାପି ଅନେକ ଲୋକେ ଏହି ସୁବିଧା ପାଉନଥିବା ଅଭିଯୋଗ ହୋଇଛି । ମଣିପୁର ଗାଁର ଅନେକ ଘର ଭାଙ୍ଗିଯାଇଛି । ବନ୍ୟା ବିପନ୍ନଙ୍କ ସହିତ ଅଧିକ ଆଲୋଚନା କରିଛନ୍ତି ଆମ ପ୍ରତିନିଧି ଜୟେନ୍ଦ୍ର ବେହେରା । ଇଟିଭି ଭାରତ, ନୟାଗଡ଼