World Cup 2023: ଆଫଗାନିସ୍ତାନ ବିପକ୍ଷରେ ଚିତପଟାଙ୍ଗ୍‌ ପାକିସ୍ତାନ, ଇର୍ଫାନଙ୍କ ସହ ଠୁମକା ଲଗାଇଲେ ରାସିଦ

ହାଇଦ୍ରାବାଦ: ମୁହଁରେ କେବଳ ଖୁସି ଆଉ ଖୁସି । ବିଜୟର ସେଲିବ୍ରେସନ ଆଉ ଧୁମ୍‌ ନାଚ । ବିଶ୍ବକପ ଟ୍ରଫି ହାତେଇବାଠୁ ଏହି ବିଜୟର ଖୁସି ଅଧିକ ମନେ ହେଉଛି । ଆଇସିସି ଦିନିକିଆ ବିଶ୍ବକପ 2023ରେ ଡିଫେଣ୍ଡିଂ ଚମ୍ପିଆନ ଇଂଲଣ୍ଡକୁ ହରାଇବା ପରେ ପାକିସ୍ତାନକୁ ପରାସ୍ତ କରିଛି ଅଫଗାନିସ୍ତାନ । ପାକିସ୍ତାନ ବିପକ୍ଷରେ ବିପର୍ଯ୍ୟୟ ଘଟାଇ ଐତିହାସିକ ବିଜୟ ହାସଲ କରିଛି ଆଫଗାନିସ୍ତାନ । ଚେନ୍ନାଇର ଏମ୍‌ଏ ଚିଦାମ୍ବରମ ଷ୍ଟାଡିୟମରେ ଖେଳାଯାଇଥିବା ମ୍ୟାଚ୍‌ରେ ପାକିସ୍ତାନକୁ ୮ ୱିକେଟ୍‌ରେ ମାତ ଦେଇଛି ଆଫଗାନିସ୍ତାନ । ପ୍ରଥମେ ବ୍ୟାଟିଂ କରି ପାକିସ୍ତାନୀ ନିର୍ଦ୍ଧାରିତ ୫୦ ଓଭରରେ ୭ ୱିକେଟ୍‌ ହରାଇ ୨୮୨ ରନ ସଂଗ୍ରହ କରିଥିଲା ପାକିସ୍ତାନ । ଜବାବରେ ପାକିସ୍ତାନୀ ବୋଲରଙ୍କୁ ନିର୍ଦ୍ଧୁମ ପ୍ରହାର କରି ୮ ୱିକେଟ୍‌ରେ ବାଜି ମାରି ନେଇଥିଲା ଆଫଗାନିସ୍ତାନ । ଏହାପରେ ଆରମ୍ଭ ହୋଇଯାଇଥିଲା ବିଜୟ ସେଲିବ୍ରେସନ । ଭାରତୀୟ ପୂର୍ବତନ କ୍ରିକେଟର ତଥା କ୍ରିକେଟ କମେଣ୍ଟେଣ୍ଟର ଇର୍ଫାନ ପଠାଣଙ୍କ ସହ ଠୁମକା ଲଗାଇଥିଲେ ଆଫଗାନିସ୍ତାନ ରାସିଦ ଖାନ । ଏହା ସହିତ ଦଳର ଅନ୍ୟ ଖେଳାଳି ଡ୍ରେସିଂ ରୁମରେ ଉତ୍ସବ ମନାଇବା ସହ ଲୁଙ୍ଗି ଡ୍ୟାନ୍ସ ଗୀତରେ ନାଚିଥିଲେ ।