ବରଗଡରେ ଶିଶୁ କର୍କଟ ସଚେତନତା କାର୍ଯ୍ୟକ୍ରମ ଅନୁଷ୍ଠିତ

ବରଗଡ: ଜିଲ୍ଲାରେ ପ୍ରଥମ ଥର ପାଇଁ ଶିଶୁ କର୍କଟ ସଚେତନତା କାର୍ଯ୍ୟକ୍ରମ ଅନୁଷ୍ଠିତ । ବରଗଡ଼ ଜିଲ୍ଲାରେ କ୍ୟାନ୍ସର ରୋଗୀଙ୍କ ସଂଖ୍ୟା ବୃଦ୍ଧି ପାଉଥିବା ବେଳେ ଶିଶୁମାନେ ମଧ୍ୟ ସେଥିରୁ ବର୍ତ୍ତି ନାହାନ୍ତି । ଏନେଇ ଶିଶୁ କର୍କଟ ରୋଗ ଉପରେ କାମ କରୁଥିବା ବରଗଡ଼ର କ୍ୟାନ୍ସର ସରଭାଇବର୍ସ ଫାଇଟର୍ସ ଗୃପ ପକ୍ଷରୁ ବିଭିନ୍ନ ବ୍ଲକରେ  ଶିଶୁ କର୍କଟ ସଚେତନତା ସଂପର୍କୀତ ସ୍ବତନ୍ତ୍ର କାର୍ଯ୍ୟକ୍ରମ ହାତକୁ କାରଯାଉଛି । ତେବେ ଭୁବନେଶ୍ୱର ସ୍ବେଚ୍ଛାସେବୀ ସଂସ୍ଥା ଉମ୍ମିଦେଁ ଓ କ୍ୟାନ୍ସର ସରଭାଇବର୍ସ ଫାଇଟର୍ସ ଗୃପ  ପକ୍ଷରୁ ପୂର୍ବରୁ ସୋହେଲାଠାରେ ଶିଶୁ କର୍କଟ ସଚେତନତା ସଂପର୍କୀତ ସ୍ବତନ୍ତ୍ର କାର୍ଯ୍ୟକ୍ରମ ଆୟୋଜିତ ହୋଇଥିବା ବେଳେ ଗତକାଲି ବିଜେପୁର ଠାରେ ଏହି କାର୍ଯ୍ୟକ୍ରମ କରଯାଇଥିଲା । ଜିଲ୍ଲାର ବିଜେପୁର ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ର ପରିସରରେ ଏକ ଶିଶୁ କ୍ୟାନ୍ସର ସଚେତନତା ରାଲି ଏବଂ ଆଲୋଚନା ଚକ୍ର ଅନୁଷ୍ଠିତ ହୋଇଯାଇଛି ।  

ତେବେ ଏହି ସଚେତନତା ରାଲିକୁ ଜିଲ୍ଲା ପରିଷଦ ଅଧ୍ୟକ୍ଷା ମାନିନୀ ଭୋଇ ପତାକା ଦେଖାଇ ଶୁଭାରମ୍ଭ କରିଥିବା ବେଳେ ଏହି ରାଲିରେ ରେଡେନ୍ସା କଲେଜ ଛାତ୍ରଛାତ୍ରୀ, ବିଜେପୁରର ଗାୟତ୍ରୀ ପରିବାର ଏବଂ ବରିଷ୍ଠ ନାଗରିକ ସଂଘ ଯୋଗଦାନ କରିଥିଲେ । ଶିଶୁ କ୍ୟାନ୍ସର କିପରି ଶୀଘ୍ର ଚିହ୍ନଟ କରାଯାଇ ତାର ଚିକିତ୍ସା କରାଯାଇପାରିବ ତାହା ଏହି ରାଲିର ମୁଖ୍ୟ ଉଦେଶ୍ୟ ରହିଥିଲା । ଏହି ସଚେତନତା ରୋଲି ସମାପ୍ତ ହେବା ପରେ ସ୍ଥାନୀୟ ବସଷ୍ଟାଣ୍ଡ ପରିସରରେ ଶିଶୁ କ୍ୟାନ୍ସର ଉପରେ ଏକ ଆଲୋଚନା ଚକ୍ର ଅନୁଷ୍ଠିତ ହୋଇଥିଲା । ଏହି ଆଲୋଚନା ଚକ୍ରରେ ଜନସାଧାରଣ ମଧ୍ୟ ଶିଶୁ କ୍ୟାନ୍ସରକୁ ନେଇ ବିଭିନ୍ନ ପ୍ରଶ୍ନ ଉପସ୍ଥାପନା କରିଥିବାବେଳେ ଉମିଦେଁ ସଂଗଠନର ଅଧ୍ୟକ୍ଷ ନିତାଇ ଗୌର ପାଣିଗ୍ରାହୀ ଉକ୍ତ ପ୍ରଶ୍ନମାନଙ୍କର ଉତ୍ତର ରଖିଥିଲେ । ତେବେ ଆଗାମୀ ଦିନରେ ଜିଲ୍ଲାର ବିଭିନ୍ନ ବ୍ଲକମାନଙ୍କରେ ମଧ୍ୟ ଏପରି ସଚେତନତା କାର୍ଯ୍ୟକ୍ରମ ରହିଥିବା ନେଇ ଫାଇଟର୍ସ ଗୃପର ଅଧ୍ୟକ୍ଷ ଅଶ୍ଵିନୀ ଦର୍ଜି ସୂଚନା ଦେଇଛନ୍ତି  ।  

ଇଟିଭି ଭାରତ, ବରଗଡ