India's Win Over Pakistan: ପ୍ରସ୍ତୁତି-ମ୍ୟାଚ୍‌-ସେଲିବ୍ରେସନ୍‌, ଭିଡିଓ ସେୟାର କଲା ବିସିସିଆଇ

କଲମ୍ବୋ: ଏସିଆ କପ୍‌ ୨୦୨୩ର ହାଇ ଭୋଲ୍‌ଟେଜ୍‌ ମ୍ୟାଚ୍‌ରେ ପାକିସ୍ତାନକୁ ଧୂଳି ଚଟାଇଲା ଭାରତ । ବର୍ଷା  ଯୋଗୁଁ ଦୀର୍ଘ ଦୁଇଦିନରେ ଖେଳାଯାଇଥିବା ଏହି ମ୍ୟାଚ୍‌ରେ ଭାରତୀୟ ଦଳର ଉଭୟ ବୋଲିଂ ଓ ବ୍ୟାଟିଂ ବିଭାଗର ଶାଣିତ ଆକ୍ରମଣରେ ପାକିସ୍ତାନ ଚିତ୍‌ପଟାଙ୍ଗ ହୋଇଥିଲା । ଅଧିନାୟକ ରୋହିତ ଶର୍ମା ଓ ଶୁଭମନ ଗିଲ୍‌ଙ୍କ ପ୍ରଥମ ଦିନର ଅର୍ଦ୍ଧଶତକୀୟ ପାଳି ଏବଂ ଦ୍ବିତୀୟ ଦିନରେ ବିରାଟ କୋହଲି ଓ କେଏଲ୍‌ ରାହୁଲଙ୍କ ବିସ୍ଫୋରକ ଶତକରେ ଭାରତ ନିର୍ଦ୍ଧାରିତ ୫୦ ଓଭରରେ ୩୫୬ ରନର ବିଶାଳ ସ୍କୋର କରିଥିଲା । ଏହାପରେ କୁଲଦୀପ ଯାଦବଙ୍କ ୫ ୱିକେଟ୍‌ ସଫଳତା ବଳରେ ପାକିସ୍ତାନକୁ କେବଳ ୧୨୮ ରନରେ ଅଟକାଇବାରେ ସଫଳ ହୋଇଥିଲା ରୋହିତ ବାହିନୀ । ତେବେ ମ୍ୟାଚ୍‌ ପୂର୍ବରୁ ଟିମ୍‌ ଇଣ୍ଡିଆର କିପରି ଥିଲା ପ୍ରସ୍ତୁତି, କିପରି ରହିଥିଲା ମ୍ୟାଚ୍‌ ବେଳର ରୋମାଞ୍ଚକ ଦୃଶ୍ୟ ଓ ପାକିସ୍ତାନ ବିପକ୍ଷରେ ବୃହତ ବିଜୟ ପରେ କିଭଳି ରହିଥିଲା ସେଲିବ୍ରେସନ୍‌, ସେ ସବୁକୁ ନେଇ ଏକ ଭିଡିଓ ସେୟାର କରିଛି ବିସିସିଆଇ । ଯାହାକୁ ପ୍ରଶଂସକମାନେ ବେଶ ପସନ୍ଦ କରୁଛନ୍ତି ।

ବ୍ୟୁରୋ ରିପୋର୍ଟ, ଇଟିଭି ଭାରତ