କଳାହାଣ୍ଡି ପାଳିଲା ପଖାଳ ଦିବସ, ପଖାଳ ସାଙ୍ଗକୁ ଅନ୍ୟ ଓଡ଼ିଆ ବ୍ୟଞ୍ଜନରେ ମହକିଲା ପରିବେଶ

Pakhala Divas Celebrated in Kalahandi: ଭବାନୀପାଟଣା: ଆଜି ହେଉଛି ବିଶ୍ବ ପଖାଳ ଦିବସ । ଏହି ଅବସରରେ କଳାହାଣ୍ଡିରେ ମଧ୍ୟ ପଖାଳ ଦିବସ ପାଳନ ହୋଇଛି । ଓଡିଆଙ୍କ ପ୍ରିୟ ଖାଦ୍ୟ ପଖାଳ । ଆମ ପରମ୍ପରା ଓ ସସ୍କୃତି ପଖାଳ ସହ ଜଡିତ । ପଖାଳ କହିଲା ମାତ୍ରେ ଓଡ଼ିଆଙ୍କ ମନରେ ଏହାକୁ ନେଇ ଦେଖାଦିଏ ଆତୁରତା । ଓଡ଼ିଆଙ୍କ ମନରେ ପଖାଳ ପାଇଁ ରହିଛି ଏକ ନିଆରା ସ୍ଥାନ । ପଖାଳ କଂସାଏ ଓଡିଆଙ୍କ ପାଇଁ ଅମୃତ ପରି । ଆଜି ବିଶ୍ବ ଦରବାରରେ ପ୍ରତିଷ୍ଠିତ ହୋଇପାରିଛି ପଖାଳ । ତେବେ ବର୍ତ୍ତମାନ ପଖାଳ ସାରା ଦେଶରେ ନୁହେଁ ବିଶ୍ବରେ ନିଜର ନିଆରା ପରିଚୟ ସୃଷ୍ଟି କରିଛି ।

ଆଜି କଳାହାଣ୍ଡି ଜିଲ୍ଲାର ଭବାନୀପାଟଣା ସହରର ମଧ୍ୟ ବିଭିନ୍ନ ସ୍ଥାନରେ ପାଳନ କରାଯାଇଛି ପଖାଳ ଦିବସ। ଏହାକୁ ନେଇ ଗାଁଠୁ ସହର, ରାସ୍ତାକଡ଼ ହୋଟେଲଠୁ ଆରମ୍ଭ କରି ବଡ଼ ବଡ଼ ହୋଟେଲ ସବୁଠି ପଡିଛି ପଖାଳର ଆସର । ପଖାଳ ଖାଇବାକୁ ଲୋକଙ୍କ ମଧ୍ୟରେ ଦେଖିବାକୁ ମିଳିଛି ଉତ୍ସାହ । କେବଳ ହୋଟେଲ, ରେଷ୍ଟୁରାଣ୍ଟ ନୁହେଁ, ବରଂ ବିଭିନ୍ନ ସାମାଜିକ ଓ ସାଂସ୍କୃତିକ ଅନୁଷ୍ଠାନ ପକ୍ଷରୁ ମଧ୍ୟ ପଖାଳ ଦିବସ ପାଳନ ହେଉଛି । ଭବାନୀପାଟଣା ସହରରେ ଥିବା ଫୁଡ୍ ପାର୍କ ଠାରେ ଆଜି ପଖାଳ ଦିବସ ପାଳନ କରାଯାଇଛି । ପଖାଳ ସହିତ ବିଭିନ୍ନ ପ୍ରକାରର ଭଜା, ଆଳୁ ଭର୍ତ୍ତା, ବଡ଼ିଚୁରା, ଶାଗ ଭଜା, ପୋଦିନାପତ୍ର ଚଟଣି, ମାଛ ଭଜା, କଲରା ଚିପ୍ପ, ସଜନା ଛୁଇଁ ଆଳୁ ବେସର, ଆଚାର, ପାମ୍ପଡ, କାକୁଡି ସାଲାଡ଼ ଆଦିର ବ୍ୟବସ୍ଥା ହୋଇଛି । ଯାହାକୁ ଖୁବ ଆନନ୍ଦର ସହ ଖାଉଛନ୍ତି ଲୋକେ ।  

ଇଟିଭି ଭାରତ, କଳାହାଣ୍ଡି