ବିଶାଳ ଶୋଭାଯାତ୍ରାରେ ଆସି ନାମାଙ୍କନ ଭରିଲେ ମନ୍ତ୍ରୀ ରାଜେନ୍ଦ୍ର ଢୋଲକିଆ - Odisha Assembly Election 2024

Rajendra Dholkia files Nomination: ନୂଆପଡ଼ା: ନାମାଙ୍କନ ଭରିଲେ ରାଜେନ୍ଦ୍ର ଢୋଲକିଆ । ନୂଆପଡ଼ା ବିଧାନସଭା ନିର୍ବାଚନ ମଣ୍ଡଳୀର ବିଜେଡି ବିଧାୟକ ପ୍ରାର୍ଥୀ ରାଜେନ୍ଦ୍ର କୁମାର ଢୋଲକିଆ ନୂଆପଡ଼ା ରିଟର୍ଣ୍ଣିଂ ଅଫିସରଙ୍କ ପାଖରେ ନାମାଙ୍କନ ପତ୍ର ଦାଖଲ କରିଛନ୍ତି । ନିଜ ବାସଭବନ ଖଡ଼ିଆଳ ରୋଡ଼ଠାରୁ ବିରାଟ ଶୋଭାଯାତ୍ରାରେ ବାହାରି ନୂଆପଡ଼ା ଏକତାଛକ ଦେଇ ଆସି ରିଟର୍ଣ୍ଣିଂ ଅଫିସରଙ୍କ ପାଖରେ ନାମାଙ୍କନ ପତ୍ର ଦାଖଲ କରିଛନ୍ତି ।

ବିଜେଡି ନେତା ଓ କର୍ମୀଙ୍କ ସମେତ ମନ୍ତ୍ରୀ ଢୋଲକିଆଙ୍କ ଶହ ଶହ ସମର୍ଥକ ନାମାଙ୍କନ ଶୋଭାଯାତ୍ରାରେ ସାମିଲ ହୋଇଥିଲେ । ରାଜେନ୍ଦ୍ର ଢୋଲକିଆ ନିର୍ବାଚନରେ ନିଶ୍ଚୟ ବିଜୟୀ ହେବେ ବୋଲି ସମର୍ଥକମାନେ ଦୃଢୋକ୍ତି ବାଢ଼ିଛନ୍ତି । ଏହି ଅବସରରେ ଢୋଲକିଆ କହିଛନ୍ତି, "ନବୀନ ସରକାରଙ୍କ ବିକାଶ ଧାରାକୁ କେହି ମଧ୍ୟ ରୋକି ପାରିବେ ନାହିଁ । ଭାରତ ବର୍ଷର ଲୋକପ୍ରିୟ ମୁଖ୍ୟମନ୍ତ୍ରୀଙ୍କ ଆଶୀର୍ବାଦରୁ ମୁଁ ଦଳୀୟ ଟିକେଟ ପାଇଛି । ଓଡିଶା ସରକାରଙ୍କ ଦ୍ବାରା କାର୍ଯ୍ୟକାରୀ ହୋଇଥିବା ଜନ୍ମଠାରୁ ମୃତ୍ୟୁ ପର୍ଯ୍ୟନ୍ତ ଜନକଲ୍ୟାଣ ଯୋଜନା ଗୁଡିକୁ ପ୍ରସଙ୍ଗ କରି ଭୋଟରଙ୍କ ପାଖକୁ ଯିବି । ଭୋଟର ମଧ୍ୟ ବୁଝି ସାରିଛନ୍ତି ଏଥର ପୁଣିଥରେ ଶଙ୍ଖ ଚିହ୍ନରେ ମୋହର ମାରି ମୋତେ ବିଜୟୀ କରିବେ ।"

ଇଟିଭି ଭାରତ, ନୂଆପଡ଼ା