ଭୁବନେଶ୍ବର: ରାଜ୍ୟପାଳ ପଦରୁ ଇସ୍ତଫା ଦେଲେ, ରାଜ୍ୟ ଛାଡିଲେ । ତଥାପି ତାଙ୍କୁ ନେଇ ରାଜ୍ୟ ରାଜନୀତିରେ ପୂର୍ଣ୍ଣଚ୍ଛେଦ ପଡୁନି । ପୂର୍ବତନ ରାଜ୍ୟପାଳ ରଘୁବର ଦାସଙ୍କୁ ନେଇ ଚର୍ଚ୍ଚା ଓ ଆରୋପ-ପ୍ରତ୍ୟାରୋପ ବଢିବାରେ ଲାଗିଛି । ଗତକାଲି ବିଜେପିରେ ପୁଣି ଥରେ ସାମିଲ ହୋଇ ରଘୁବର ପ୍ରଥମ ପ୍ରତିକ୍ରିୟା ରଖିବା ପରେ ରାଜ୍ୟ ରାଜନୀତିରେ ଦେଖାଯାଇଛି ଉଷ୍ମତା । ବିରୋଧୀ ‘ବିଜେଡି’ କହିଛି, ରଘୁବର ରାଜ୍ୟପାଳ ନୁହନ୍ତି ବରଂ ବିଜେପି ଏଜେଣ୍ଟ ହୋଇଆସିଥିଲେ । ସେ ରାଜ୍ୟପାଳ ପଦବୀର ପଦ ମର୍ଯ୍ୟାଦାକୁ କ୍ଷୂର୍ଣ୍ଣ କରିଛନ୍ତି । ନବୀନଙ୍କ ପରି ଲୋକପ୍ରିୟ ବ୍ୟକ୍ତିତ୍ବଙ୍କୁ ପରାହତ କରିବା ପାଇଁ ସେ କାମ କରୁଥିଲେ, ଯାହା ଗତତାଲି ତାଙ୍କ ବୟାନରୁ ସ୍ପଷ୍ଟ ହୋଇଛି ।
- ଲାଟ ସାହେବ ପରମ୍ପରାକୁ ଭାଙ୍ଗିଛି: ରଘୁବର
ଗତକାଲି ରାଞ୍ଚିରେ ରଘୁବର ଦଳୀୟ କାର୍ଯ୍ୟାଳୟରେ ପଦ୍ମ ଧରିବା ପରେ ପ୍ରତିକ୍ରିୟା ରଖିଥିଲେ । ଓଡ଼ିଶାରେ ସେ ରାଜ୍ୟପାଳ ଥିବା ଅନୁଭବକୁ ବ୍ୟକ୍ତ କରି କହିଥିଲେ,‘‘ ପବିତ୍ର ମାଟିର ସେବା କରିବା ଲାଗି ମହାପ୍ରଭୁ ଜଗନ୍ନାଥ ମୋତେ ସୁଯୋଗ ଦେଇଥିଲେ । ରାଜ୍ୟପାଳଙ୍କ ପଦ ଲାଟ ସାହେବଙ୍କ ପଦ ବୋଲି କୁହାଯାଏ । ଏହି କଥାକୁ ମୁଁ ଓଡ଼ିଶାରେ ଭାଙ୍ଗିଛି । ରାଜ୍ୟପାଳ ଲାଟ ସାହେବ ନୁହଁନ୍ତି ବରଂ ସେ ହେଉଛନ୍ତି ଜନତାଙ୍କର । ମୁଁ ଓଡିଶାରେ 3 ମାସରେ 30 ଜିଲ୍ଲା ବୁଲିଲି । ଓଡିଶାବାସୀଙ୍କ ସ୍ଥିତି ଜାଣିବାକୁ ଚେଷ୍ଟା କଲି । କେନ୍ଦ୍ର ସରକାରଙ୍କ ଯୋଜନା ସେମାନଙ୍କ ପାଖରେ ପହଞ୍ଚୁଛି କି ନାହିଁ ଜାଣିବାକୁ ଚେଷ୍ଟା କଲି । ସମସ୍ୟା ରହୁଥିଲେ ପଦକ୍ଷେପ ନେବାକୁ ଜିଲ୍ଲାପାଳଙ୍କୁ ନିର୍ଦ୍ଦେଶ ଦେଉଥିଲି । କେନ୍ଦ୍ର ଓ ରାଜ୍ୟ ସରକାରଙ୍କୁ ଏ ବାବଦରେ ଅବଗତ କରୁଥିଲି ।"
- ବିଜେପି ଏଜେଣ୍ଟ ହୋଇ ଓଡ଼ିଶା ଆସିଥିଲେ: ବିଜେଡି
ତେବେ ଏହାକୁ ନେଇ ସିଧା ରାଜନୀତି ଓ ରାଜ୍ୟପାଳଙ୍କ ସାମ୍ବିଧାନିକ ପଦ ମର୍ଯ୍ୟାଦାର ପ୍ରଶ୍ନ ଉଠାଇଛି ବିଜେଡି । ବିଜେଡି ବିଧାୟକ ସାରଦା ଜେନା କହିଛନ୍ତି,"ଗତକାଲି ଓଡିଶାର ପୂର୍ବତନ ରାଜ୍ୟପାଳ ରଘୁବର ଦାସ ବିଜେପିରେ ସାମିଲ ହୋଇଛନ୍ତି । ପୁନର୍ବାର ବିଜେପିରେ ସାମିଲ ହୋଇ ସେ ଯେଉଁ ମନ୍ତବ୍ୟ ଦେଇଛନ୍ତି ତାହା ଦୁର୍ଭାଗ୍ୟଜନକ । ରାଜ୍ୟପାଳ ଭଳି ଏକ ସାମ୍ବିଧାନିକ ପଦ ପାଇଁ ଇଏ ଅବମର୍ଯ୍ୟାଦା । ସାମ୍ବିଧାନିକ ପଦରେ ରହୁଥିବା ଜଣେ ବ୍ୟକ୍ତି ଯଦି ଏକ ନିର୍ଦ୍ଦିଷ୍ଟ ରାଜନୈତିକ ଦଳ ପାଇଁ କାର୍ଯ୍ୟ କରେ ତାହା ଭାରତୀୟ ଗଣତାନ୍ତ୍ର ପ୍ରତି ବିପଦ । ଯାହା ରଘୁବରଙ୍କ ବକ୍ତବ୍ୟରୁ ସ୍ପଷ୍ଟ ହେଉଛି । ସେ ଓଡିଶାର ରାଜ୍ୟପାଳ ନଥିଲେ । ବିଜେପିର ଏଜେଣ୍ଟ ଭାବରେ ସେ ଓଡିଶାକୁ ଆସିଥିଲେ । ଓଡିଶାରେ ବିଜେପି କିପରି କ୍ଷମତାକୁ ଆସିବ ସେନେଇ କାମ କରୁଥିଲେ । ନବୀନ ପଟ୍ଟନାୟକଙ୍କ ଭଳିଆ ବ୍ୟକ୍ତିତ୍ୱଙ୍କୁ ହରାଇବାକୁ କୂଟ କରିଥିଲେ । ଯାହା କାଲି ତାଙ୍କ ବକ୍ତବ୍ୟରୁ ସ୍ପଷ୍ଟ ହେଉଛି । ନବୀନ ସାଧାରଣ ଲୋକଙ୍କ ସହିତ ଥିଲେ । ନବୀନଙ୍କ ଲୋକାଭିମୁଖୀ କାର୍ଯ୍ୟକୁ କିପରି ବନ୍ଦ ହେବ ଶ୍ରେୟ କେନ୍ଦ୍ର ସରକାରକଙ୍କ ନିକଟକୁ ଯିବ ସେନେଇ ସେ କାର୍ଯ୍ୟ କରୁଥିଲେ ।"
ଏହା ମଧ୍ୟ ପଢନ୍ତୁ:- ରାଜନୀତିକୁ ଫେରିଲେ ରଘୁବର, ପୁଣି ଧରିଲେ ପଦ୍ମ - RAGHUBAR DAS REJOINS BJP |
- ନବୀନ ଯାଉନଥିଲେ, ରାଜ୍ୟପାଳ ଲୋକଙ୍କ ନିକଟକୁ ଯାଉଥିଲେ: ବିଜେପି
ବିଜେପି ବିଧାୟକ ସରୋଜ ପାଢ଼ୀ କହିଛନ୍ତି, "ରାଜ୍ୟପାଳ ରାଜ୍ୟର ମୁଖ୍ୟ । ତାଙ୍କର ଦାୟିତ୍ୱ ରହିଛି । ରାଜ୍ୟରେ ବିଭିନ୍ନ ସମୟରେ ବିଭିନ୍ନ ଜିଲ୍ଲାପାଳ ରହିଛନ୍ତି । କିନ୍ତୁ ସେମାନେ ଲୋକଙ୍କ ପାଖକୁ ଯାଆନ୍ତି ନାହିଁ । ରଘୁବର ଦାସ ଲୋକଙ୍କ ପାଖକୁ ଯାଉଥିଲେ । ଲୋକଙ୍କ ସମସ୍ୟା ବୁଝୁଥିଲେ । ଘଟଣାସ୍ଥଳରେ ହିଁ ତୁରନ୍ତ ପଦକ୍ଷେପ ପାଇଁ ନିର୍ଦ୍ଦେଶ ଦେଉଥିଲେ । ଲୋକ ସହ ମିଶି ସେମାନଙ୍କ ସମସ୍ୟା, ଆବଶ୍ୟକତା, ଭାଷା ଓ ବ୍ୟବସ୍ଥା ବାବଦରେ ସେ ବୁଝୁଥିଲେ । ରାଜ୍ୟପାଳ ପଦ ଏକ ସାମ୍ବିଧାନିକ ପଦବୀ । କେବେ ବି ସେ ଏହାକୁ ଉଲ୍ଲଂଘନ କରିନାହାନ୍ତି । ବିଜେଡି ଅଭିଯୋଗ କରିବା ସ୍ୱାଭାବିକ କଥା । ତତ୍କାଳୀନ ମୁଖ୍ୟମନ୍ତ୍ରୀ ଲୋକଙ୍କ ସହ ରହିବା କଥା । ଏତେ ଦିନ ମୁଖ୍ୟମନ୍ତ୍ରୀ ଭାବେ ଲୋକେ ତାଙ୍କୁ ଦାୟିତ୍ୱ ଦେଲେ । କିନ୍ତୁ ସେ ଓଡ଼ିଆ ଭାଷା ଶିକ୍ଷି ପାରିଲେ ନାହିଁ । ଲୋକଙ୍କ ପାଖକୁ ଯାଇପାରିଲେ ନାହିଁ । ଯେତେବେଳେ ଜଣେ ରାଜ୍ୟପାଳ ଲୋକଙ୍କ ପାଖକୁ ଗଲେ, ସେତେବେଳେ ବିଜେଡି ମନରେ ଛନକା ପଶିଲା । ଲୋକେ ସରକାରରୁ ବାହାର କରିବା ପରେ ବିଜେଡିର ରାଜକୀୟ ଠାଣି ଯାଇନାହିଁ ।"
ଇଟିଭି ଭାରତ, ଭୁବନେଶ୍ବର
