ଦଶପଲ୍ଲାରେ ସରିଲା ମତଦାନ, ପତ୍ନୀଙ୍କ ସହ ଯାଇ ଭୋଟ ଦେଲେ ରମେଶ ବେହେରା - Ramesh Behera cast vote

Ramesh Behera cast vote: ନୟାଗଡ଼: ଆଜି ରାଜ୍ୟରେ ସରିଛି ଦ୍ବିତୀୟ ପର୍ଯ୍ୟାୟ ମତଦାନ । ରାଜ୍ୟରେ ୫ ଲୋକସଭା ସମେତ ଏହା ଅଧୀନ ୩୫ ବିଧାନସଭା କ୍ଷେତ୍ରରେ ମଧ୍ୟ ପଡ଼ିଛି ଭୋଟ । କନ୍ଧମାଳ ସଂସଦୀୟ କ୍ଷେତ୍ରର ୧୨୧ ନଂ ଦଶପଲ୍ଲା ବିଧାନସଭା ନିର୍ବାଚନ ମଣ୍ଡଳୀରେ ମଧ୍ୟ ଅନୁଷ୍ଠିତ ହୋଇଛି ଗଣତନ୍ତ୍ରର ମହାପର୍ବ । ଏହି ନିର୍ବାଚନ ମଣ୍ଡଳୀର ବିଭିନ୍ନ ବୁଥରେ ଭୋଟରମାନେ ବେଶ ଉତ୍ସାହର ସହ ନଜ ନିଜର ମତ ସାବ୍ୟସ୍ତ କରିଛନ୍ତି । ଏହି ନିର୍ବାଚନ ମଣ୍ଡଳୀ ଗଣିଆ, ନୂଆଗାଁ ଓ ଦଶପଲ୍ଲା ଭଳି ୩ଟି ବ୍ଲକ ଓ ଗୋଟିଏ NACକୁ ନେଇ ଗଠିତ । ଏଥି ମଧ୍ୟରୁ ଗଣିଆ ବ୍ଲକରେ ୪୧ଟି ମତଦାନ କେନ୍ଦ୍ର ରହିଥିଲାବେଳେ, ନୂଆଗାଁ ବ୍ଳକରେ ୯୩ ଓ ଦଶପଲ୍ଲା ବ୍ଲକରେ ୧୦୦ଟି ବୁଥ ରହିଥିଲା । ସୁରକ୍ଷା ବଳୟ ଭିତରେ ଦଶପଲ୍ଲା ବିଜେଡି ପ୍ରାର୍ଥୀ ରମେଶ ଚନ୍ଦ୍ର ବେହେରା ଆସି ଭୋଟରଙ୍କ ଲମ୍ବା ଲାଇନରେ ଛିଡ଼ା ହୋଇ 120 ନମ୍ବର ବୁଥରେ ମତଦାନ କରିଥିଲେ । ସମସ୍ତ ବୁଥରେ ଶାନ୍ତି ଶୃଙ୍ଖଳାର ସହ ଭୋଟ ଗ୍ରହଣ ଶେଷ ହୋଇଛି ।

ଇଟିଭି ଭାରତ, ନୟାଗଡ଼