କଲରାପତରିଆ ବାଘର ମୃତଦେହ ଉଦ୍ଧାର, ମୃତ୍ୟୁ କାରଣ ଅସ୍ପଷ୍ଟ - Tiger Found dead

Tiger Found dead: ସମ୍ବଲପୁର: ଉଦ୍ଧାର ହେଲା ମୃତ କଲରାପତରିଆ ବାଘ । ବୁଧବାର ସମ୍ବଲପୁର ଜିଲ୍ଲା ରେଢ଼ାଖୋଲ ଅଞ୍ଚଳରେ ଏକ କଲରାପତରିଆ ବାଘର ମୃତଦେହକୁ ଉଦ୍ଧାର କରିଛି ବନ ବିଭାଗ l ବନ ବିଭାଗ ବାଘର ମୃତଦେହକୁ ବ୍ୟବଚ୍ଛେଦ ମଧ୍ୟ କରିଥିବା ଜଣାପଡ଼ିଛି । ତେବେ କେଉଁ ପରିସ୍ଥିତିରେ ବାଘର ମୃତ୍ୟୁ ହୋଇଛି ତାହା ସ୍ପଷ୍ଟ ହୋଇନାହିଁ l ବ୍ୟବଚ୍ଛେଦ ରିପୋର୍ଟ ଆସିବା ପରେ ମୃତ୍ୟୁର ପ୍ରକୃତ କାରଣ ଜଣାପଡିବ ବୋଲି DFO କହିଛନ୍ତି l 

ସମ୍ବଲପୁର ଜିଲ୍ଲା ରେଢ଼ାଖୋଲ ଡିଭିଜନ, ନାକଟିଦେଉଳ ରେଞ୍ଜ ଅନ୍ତର୍ଗତ ଲାଣ୍ଡିମାଲ ସଂରକ୍ଷିତ ଜଙ୍ଗଲ ନିକଟ ଭୀମମଣ୍ଡଳୀ ଜଙ୍ଗଲ ନିକଟ ରାସ୍ତାରେ ଏକ ୧୦ ବର୍ଷର ଅଣ୍ଡିରା କଲରାପତରିଆ ବାଘର ମୃତଦେହକୁ ଉଦ୍ଧାର କରିଛି ରେଢ଼ାଖୋଲ ବନ ବିଭାଗ l ଖବର ପାଇ ଭୂବନେଶ୍ବରରୁ ଜେଟିଏଫ ଟିମ୍, ସମ୍ବଲପୁର ଆରସିସିଏଫ ରେଢ଼ାଖୋଲ ଡିଏଫଓଙ୍କ ସହ ଆଲୋଚନା କରି ତଦନ୍ତ ଜାରି ରଖିଛି l ବାଘଟିକୁ ଗୁଳି କରି ଶୀକାର କରାଯାଇଛି ନା ମୃତ୍ୟୁ ପଛରେ ଅନ୍ୟ କିଛି କାରଣ ଅଛି, ଏହି ସବୁ ଦିଗକୁ ନେଇ ତଦନ୍ତ କରୁଛି ବନ ବିଭାଗ l ତେବେ ୨୪ ଘଣ୍ଟା ପୂର୍ବରୁ ବାଘଟିର ମୃତ୍ୟୁ ହୋଇଥିବା ଅନୁମାନ କରାଯାଉଛି ବୋଲି DFO ସୂଚନା ଦେଇଛନ୍ତି l ସେପଟେ ମୃତ ବାଘର ବ୍ୟବଚ୍ଛେଦ କରାଯିବା ପରେ  ମୃତଦେହକୁ ପୋଡି ଦିଆଯାଇଥିବା ରେଢ଼ାଖୋଲ ଡିଏଫଓ ଅରବିନ୍ଦ ମହାନ୍ତି ସୂଚନା ଦେଇଛନ୍ତି l

ଇଟିଭି ଭାରତ, ସମ୍ବଲପୁର