वॉशिंग्टन - अमेरिकेचे राष्ट्राध्यक्ष डोनाल्ड ट्रम्प यांनी आपल्यावरील महाभियोग हा सिनेटमध्ये लवकरात लवकर दाखल करावा, अशी मागणी केली आहे. तसेच, प्रतिनिधींच्या सभागृहामध्ये झालेली चाचणी ही योग्य प्रकारे झाली नसल्याची टीकाही त्यांनी यावेळी केली.
प्रतिनिधींच्या सभागृहामध्ये वकील, साक्षी किंवा पुरावे या सर्वांशिवाय महाभियोगाची प्रक्रिया पार पाडल्यानंतर, आता डेमोक्रॅटिक पक्ष सिनेटला या प्रक्रियेबद्दल ज्ञान देत आहेत. त्यांच्याकडे कोणत्याही प्रकारचा पुरावा उपलब्ध नाही, किंवा यापुढेही नसणार आहे. त्यांना जर मी पदावरून गेलेलो हवा आहे, तर मलाही लवकरात लवकर चाचणी हवी आहे, असे ट्विट त्यांनी गुरुवारी केले.
त्याअगोदर, अमेरिकन प्रतिनिधीसभेच्या सभापती नॅन्सी पेलोसी यांनी ट्विट करत, महाभियोग प्रस्ताव हा निर्विवादपणे सिनेटमध्ये मांडला जाईल अशा आशयाचे ट्विट केले होते. डोनाल्ड ट्रम्प यांचे ट्विट हे त्याला प्रत्युत्तर असल्याची चर्चा सध्या माध्यमांमध्ये सुरू आहे.
