वॉशिंग्टन- डोनाल्ड ट्रम्प यांनी रविवारी अमेरिकेचे ४७ वे राष्ट्राध्यक्ष ( Donald trump second term) म्हणून शपथ घेतली. यापूर्वी ट्रम्प यांनी २०१७ मध्ये अमेरिकेचे ४५ वे अध्यक्ष म्हणून काम पाहिलं होतं. परंतु २०२० मध्ये झालेल्या निवडणुकीत जो बायडेन यांच्याकडून त्यांचा पराभव झाला होता. त्यांनी पदाची शपथ घेतल्यानंतर पंतप्रधान मोदींनी अभिनंदन करून पुढील वाटचालीसाठी शुभेच्छा दिल्या आहेत.
डोनाल्ड ट्रम्प यांनी कॅपिटल रोटुंडा येथे भाषणात अमेरिकेच्या सुवर्णयुगाची सुरुवात झाल्याचं म्हटलं. ट्रम्प म्हणाले, " मागील सरकार (जो बायेडन) हे देशांतर्गत आणि बाह्य आव्हानांना तोंड देण्यात अपयशी ठरलं. त्यांनी इतर देशांना सीमा सुरक्षित करण्यासाठी आर्थिक मदत केली. परंतु अमेरिकेच्या सीमा सुरक्षित करण्यात अपयशी ठरले. अतिखर्च आणि ऊर्जेच्या किमती वाढल्या आहेत. त्यामुळं मी राष्ट्रीय ऊर्जा आणीबाणी जाहीर करत आहे." याशिवाय, डोनाल्ड ट्रम्प यांनी अमेरिकेच्या दक्षिण सीमेवरील घुसखोरी रोखण्यासाठी सैन्य पाठविण्यात येणार असल्याचं जाहीर केलं.
President Trump’s Celebratory Victory Rally https://t.co/MCKNpDh8kG
— Donald J. Trump (@realDonaldTrump) January 19, 2025
डोनाल्ड ट्रम्प यांच्या या आहेत १० मोठ्या घोषणा
- अमेरिका-मेक्सिको सीमेवर राष्ट्रीय आणीबाणीची घोषणा
- बेकायदेशीर शस्त्रांवर बंदी
- अमेरिकेतील घुसखोरांची हकालपट्टी
- इतर देशांच्या उत्पादनांवर कर वाढवून अमेरिका पुन्हा श्रीमंत कणं
- वंशवाद नष्ट करून सामर्थ्यशाली समाजाची निर्मिती करणं
- पनामा कालवा पुन्हा अमेरिकेकडं घेणं
- अमेरिकेत फक्त पुरुष आणि स्त्री हे लिंग असणार. तृतीयपंथी लिंग रद्द करणं
- कोरोना काळात काढून टाकलेल्या सरकारी कर्मचाऱ्यांना पूर्ववत नोकऱ्या बहाल करणं
- आर्थिक संकटावर मात करण्यासाठी 'ड्रिल बेबी ड्रिल' धोरण लागू करणं
- मेक्सिकोच्या आखाताचे नाव बदलणं
- अभिव्यक्ती स्वातंत्र्यावर सरकारी सेन्सॉरशिप रोखणं.
पंतप्रधान मोदींनी ट्रम्प यांचं केलं अभिनंदन- पंतप्रधान नरेंद्र मोदींनी एक्स मीडियातील पोस्टमध्ये म्हटलं, "माझे प्रिय मित्र राष्ट्राध्यक्ष डोनाल्ड ट्रम्प यांनी अमेरिकेचे ४७ वे राष्ट्राध्यक्ष म्हणून ऐतिहासिक शपथ घेतल्याबद्दल त्यांचे अभिनंदन! मी दोन्ही देशांना लाभ मिळवून देण्यासाठी आणि जगाचे भविष्य घडविण्यासाठी तत्पर आहे. येणाऱ्या काळात यश मिळविण्याकरिता त्यांना सदिच्छा!"ट्रम्प यांच्या शपथविधी सोहळ्याला जगभरातील देशांचे राष्ट्रप्रमुख आणि प्रमुख नेते उपस्थित होते. भारताचे प्रतिनिधी म्हणून परराष्ट्र मंत्री एस. जयशंकर हे शपथविधी सोहळ्याला उपस्थित राहिले.
रोटुंडा येथे पार पडला शपथविधी सोहळा- रोटुंडा येथे अमेरिकेच्या सर्वोच्च न्यायालयाचे मुख्य न्यायाधीश जॉन रॉबर्ट्स यांनी डोनाल्ड ट्रम्प यांनी शपथ दिली. प्रथेप्रमाणं अमेरिकेचे अध्यक्ष कॅपिटॉलच्या पायऱ्यांवर अध्यक्ष पदाची शपथ घेतात. परंतु तेथील कडाक्याच्या थंडीमुळे रोटुंडा येथे शपथविधी समारंभाचं आयोजन करण्यात आलं होतं. मावळते राष्ट्राध्यक्ष जो बायडेन आणि त्यांच्या कुटुंबातील सदस्यांव्यतिरिक्त, मावळते उपराष्ट्रपती कमला हॅरिस, माजी राष्ट्राध्यक्ष बराक ओबामा आणि त्यांच्या पत्नी मिशेल ओबामा, माजी राष्ट्राध्यक्ष बिल क्लिंटन आणि त्यांच्या पत्नी हिलरी क्लिंटन, माजी राष्ट्राध्यक्ष जॉर्ज बुश हे देखील शपथविधी सोहळ्याला उपस्थित उपस्थित होते.
हेही वाचा-
