ভৰলুক প্ৰদূষণ মুক্ত কৰাৰ আহ্বান জ্যেষ্ঠ অধিবক্তা সত্যেন শৰ্মাৰ

ভৰলু নৈ নিষ্কাশনৰ নামত জি এম চিয়ে প্ৰতি বছৰে কোটি কোটি টকা খৰচ কৰিছে যদিও আজি পৰ্যন্ত পৰিষ্কাৰ নহ’ল ভৰলু আৰু মৰা ভৰলু ৷ মহানগৰবাসীয়ে পেলোৱা আৱৰ্জনাৰে ভৰলুৰ পানী বৰ্তমান ডাঠ ক'লা আৰু দুৰ্গন্ধময় হৈ পৰিছে ৷ প্ৰায় 330 টা নলা নৰ্দমাৰ জৰিয়তে ভৰলুত নিতৌ পৰে মানুহৰ ঘৰ, দোকান-পোহাৰ তথা কল কাৰখানাৰ পৰা ওলোৱা লেতেৰা পানী ৷ অতি বিপজ্জনক কথাটো হ'ল যে, ভৰলুৰ প্ৰদূষিত পানীয়ে মহানগৰীৰ জলস্তৰ দূষিত কৰিছে ৷ এই সম্পৰ্কে জ্যেষ্ঠ অধিবক্তা সত্যেন শৰ্মাই প্ৰতিক্ৰিয়া প্ৰকাশ কৰি কয় যে, "ভৰলু আৰু মৰাভৰলুৰ পানী যথেষ্ঠ প্ৰদূষিত হৈ পৰিছে ৷ ফলত মহানগৰীৰ জলস্তৰ প্ৰদূষিত হৈছে ৷ সেই প্ৰদূষিত পানীকে গুৱাহাটীবাসীয়ে টিউবেল বা বৰিঙৰ জৰিয়তে ব্যৱহাৰ কৰি আহিছে৷ সেইকাৰণে খুউৱ সাৱধান হোৱাৰ সময় আহি পৰিছে ৷" ইয়াৰ লগতে ভৰলুক প্ৰদূষণ মুক্ত কৰাৰ বাবে প্ৰদূষণ নিয়ন্ত্ৰণ বৰ্ডক অনতি পলমে ব্যৱস্থা গ্ৰহণ কৰিবলৈ অনুৰোধ জনাইছে সত্যেন শৰ্মাই ৷ ইয়াৰ উপৰি এই ক্ষেত্ৰত চৰকাৰ প্ৰশাসনক দোষ দি লাভ নাই বুলি মন্তব্য কৰি এইক্ষেত্ৰত জনসাধাৰণ নিজেও সচেতন হোৱা উচিত বুলি মন্তব্য কৰে জ্যেষ্ঠ অধিবক্তা সত্যেন শৰ্মাই ৷ ইপিনে কামৰূপ মহানগৰ জিলা উপায়ুক্তই প্লাষ্টিক বন্ধ কৰাৰ বাবে কেইবাবাৰো নিৰ্দেশ জাৰি কৰিছে যদিও সেয়া ফাইলতে থাকি গৈছে ৷ তদুপৰি মহানগৰীত ছোৱেৰেজ চিষ্টেমে নাই বুলি মন্তব্য কৰি চৰকাৰ প্ৰশাসনক ছোৱেৰেজ বৰ্ডখনে (sewerage board) কি কাম কৰি আছে তাৰ খবৰ ৰাখিব লাগে বুলি মন্তব্য কৰে সত্যেন শৰ্মাই ৷ GMC , GMDA, প্ৰদূষণ নিয়ন্ত্ৰণ ব'ৰ্ড আৰু ছোৱেৰেজ ব'ৰ্ড একে লগে মিলি সজাগ হৈ ভৰলুৰ প্ৰদূষণ ৰোধ কৰিবলৈ চেষ্টা কৰিলে নোৱাৰাৰ কোনো কাৰণ নেদেখো বুলি মন্তব্য কৰে সত্যেন শৰ্মাই ৷