Road accident at Rangapara: ৰঙাপৰাত পথৰ দাঁতিত বাগৰিল বলেৰ' গাড়ী

হেঁপাহৰ ভোগালী বিহুৰ আনন্দ-উল্লাসৰ মাজতে আজি শোণিতপুৰ জিলাৰ ৰঙাপৰাত সংঘটিত হয় এক পথ দুৰ্ঘটনা(Road accident at Rangapara) । পুৱা প্ৰায় ৯.৩০ বজাত ৰঙাপৰাৰ পৰা যোগীবিল সাপ্তাহিক বজাৰৰ অভিমুখে গৈ থকা এ এছ ১২ চি ৭২৪৬ নম্বৰৰ এখন মালবাহী বলেৰ' গাড়ী নিয়ন্ত্ৰণ হেৰুৱাই পথৰ দাঁতিত বাগৰি পৰে ।

এই দুৰ্ঘটনাক লৈ অঞ্চলটোত হুৱাদুৱাৰ সৃষ্টি হয় । বজাৰখন পোৱাৰ কিছু আগতে সংঘটিত হয় এই দুৰ্ঘটনাটো । গাড়ীখন বাগৰি পৰাত গাড়ীখনৰ ভিতৰত থকা চালকসহ তিনিজন ব্যৱসায়ীৰ কথমপি প্ৰাণৰক্ষা পৰে যদিও লোককেইজন গুৰুতৰভাৱে আঘাতপ্ৰাপ্ত হয়(Three people injured in a road accident) ।

দুঘৰ্টনাত আহত হোৱা লোককেইজন ২ নং নামনি গাঁৱৰ মধু চাহা, ৰেলৱে বজাৰৰ দিলীপ বৈশ্য আৰু ১ নং ৱাৰ্ডৰ ৰাজেশ গুপ্তা বুলি জানিব পৰা হৈছে ৷ তেওঁলোকক লগে লগে ৰঙাপৰা ক্ষুদ্ৰ স্বাস্থ্যকেন্দ্ৰলৈ লৈ যোৱা হয় । ৰঙাপৰা-যোগীবিল সংযোগী পথচোৱাৰ একাংশ পথ বিধ্বস্ত হোৱাৰ বাবেই এই দুৰ্ঘটনাটো সংঘটিত হোৱা বুলি ৰাইজে জানিবলৈ দিয়ে । সম্প্ৰতি ঘটনা সন্দৰ্ভত ৰঙাপৰা আৰক্ষীয়ে তদন্ত অব্যাহত ৰাখিছে ।