Miscreant snatches Money: শিক্ষকৰ গাত খজুৱতিৰ ঔষধ চটিয়াই লক্ষাধিক লৈ উধাও দুৰ্বৃত্ত

ডিফু, 8 আগষ্ট: সাৱধান! দুৰ্বৃত্তৰ শেন চকু পথচাৰী জনতাৰ কষ্টোপাৰ্জিত ধনৰ ওপৰত ৷ যিকোনো মূহুৰ্ততেই আপোনাৰ লগত থকা কষ্টোপাৰ্জিত ধন কৌশলেৰে লুটি নিয়াৰ বাবে ৰাজপথত সক্ৰিয় হৈ আছে একাংশ দুৰ্বৃত্ত ৷ উল্লেখ্য যে, ৰাজ্যত চিলনী চোৰে সন্ত্ৰাস সৃষ্টি কৰি থকাৰ সময়তে মঙলবাৰে দিন দুপৰতে বকলীয়াঘাটত সংঘটিত হৈছে অনুৰূপ ঘটনা ৷ 

প্ৰাপ্ত খবৰ অনুসৰি আজি দিন-দুপৰতে বকলীয়াঘাটত শিক্ষকৰ শৰীৰত খজুৱতিৰ ঔষধ চতিয়াই চোৰে লুটিলে 1 লাখ 20 হাজাৰ টকা ৷ বকলীয়াঘাটৰ এল পি স্কুলৰ শিক্ষক ছিম তেৰাঙে SBI বকলীয়াঘাট শাখাৰ পৰা ধন উলিয়াই বজাৰ কৰিবলৈ আহোঁতেই এই ঘটনাটো সংঘটিত হয় ৷ 

বেংকৰ পৰাই অনুসৰণ কৰি অহা চোৰটোৱে বকলীয়াঘাট বজাৰত শিক্ষকগৰাকীৰ শৰীৰত খজুৱতিৰ ঔষধ চটিয়াই দিয়ে ৷ ফলত খজুৱটিত দিক-বিদিক হেৰুৱাৰ সময়তে শিক্ষকজনৰ মোনা সহিতে লক্ষাধিক টকা লৈ উধাও হয় চোৰটো ৷ সম্প্ৰতি বকলীয়াঘাট আৰক্ষীয়ে ঘটনাটোক লৈ অভিযান অব্যাহত ৰাখিছে ৷

লগতে পঢ়ক: Theft incident: অৱসৰপ্ৰাপ্ত শিক্ষকৰ পৰা ২ লাখ ৬০ হাজাৰ টকা চুৰি দুৰ্বৃত্তৰ