টেংকাৰ নিৰ্মাণকাৰী কাৰখানাত ভয়ংকৰ বিস্ফোৰণত নিহত কৰ্মচাৰী - Tragic Incident in Bokakhat

গোলাঘাট, ১৫ জুলাই: গোলাঘাট জিলাৰ বোকাখাতৰ 'এক্সপ্ল'টেক ইণ্ডিয়া' নামৰ এটা টেংকাৰ নিৰ্মাণকাৰী কাৰখানাত সোমবাৰে এক ভয়ংকৰ বিস্ফোৰণ সংঘটিত হোৱাত থিতাতে নিহত হয় এজন কৰ্মচাৰী । টেংকীৰ কামত কৰ্মৰত অৱস্থাতেই এই বিস্ফোৰণ ঘটাত ললিত গন্ধীয়া নামৰ কৰ্মচাৰীজনৰ ঘটনাস্থলীতে মৃত্যু হয় । নিহত কৰ্মচাৰীজনৰ ঘৰ বোকাখাতৰ লখৌজানত । এন কে হাজৰিকা নামৰ লোকজনৰ মালিকানাধীন এই কাৰখানাটোত টেংকাৰ নিৰ্মাণ আৰু মেৰামতি কৰা হয় ।

AS 01 QC 6741 নম্বৰৰ টেংকাৰখন মেৰামতি কৰি থকা অৱস্থাত ভিতৰত পেট্ৰ'লজাত কিছু সামগ্ৰী থকা বাবেই উক্ত ঘটনা সংঘটিত হোৱাৰ সন্দেহ কৰা হৈছে । ইপিনে, এই প্ৰতিষ্ঠানটোত কৰ্মচাৰী সকলৰ বাবে কোনো ধৰণৰ সুৰক্ষা ব্যৱস্থা নথকাৰ অভিযোগ উত্থাপন কৰিছে স্থানীয় ৰাইজে ।  

ঘটনাটো সংঘটিত হোৱাৰ পিচতেই ঘটনাস্থলীত বোকাখাত থানাৰ আৰক্ষীৰ দল এটা উপস্থিত হৈ মৃতদেহটো উদ্ধাৰ কৰি মৰণোত্তৰ পৰীক্ষাৰ বাবে শ্বহীদ কুশল কোঁৱৰ অসামৰিক চিকিৎসালয়লৈ প্ৰেৰণ কৰাৰ লগতে তদন্ত প্ৰক্ৰিয়া আৰম্ভ কৰিছে ।

লগতে পঢ়ক:বিদ্যুৎ বিভাগৰ গাফিলতিৰ বাবেই প্ৰাণ গ'ল একে পৰিয়ালৰ দুটি শিশুৰ - Dibrugarh Tragic Incident