کنگنا رناوت تھپڑ معاملہ: سی آئی ایس ایف کانسٹیبل بحال، بنگلورو میں تعینات، سی آئی ایس ایف کی وضاحت - Kangana Ranaut slapgate

سنٹرل انڈسٹریل سیکورٹی فورس (سی آئی ایس ایف) کانسٹیبل کلوندر کور کو گزشتہ ماہ اداکار سے سیاست دان بنی اور بی جے پی رکن پارلیمنٹ کنگنا رناوت کو چندی گڑھ ہوائی اڈے پر مبینہ طور پر تھپڑ مارنے کے بعد معطل کردیا گیا تھا۔

چنڈی گڑھ: سنٹرل انڈسٹریل سیکورٹی فورس (سی آئی ایس ایف) کانسٹیبل کلوندر کور کی ملازمت بحال کردی گئی اور انہیں بنگلورو منتقل کر دیا گیا ہے۔ کلوندر کور نے گزشتہ ماہ اداکار سے سیاست دان بنی اور بی جے پی رکن پارلیمنٹ کنگنا رناوت کو چندی گڑھ ہوائی اڈے پر مبینہ طور پر تھپڑ مارا تھا۔ اس واقعے کے بعد انہیں معطل کر دیا گیا تھا۔ سرکاری ذرائع نے بتایا کہ انہیں دوبارہ بحال کر کے بنگلورو میں تعینات کر دیا گیا ہے۔

تازہ طور پر سنٹرل انڈسٹریل سیکورٹی فورس (سی آئی ایس ایف) نے بدھ کو وضاحتی بیان جاری کرکے کہا کہ کانسٹیبل کلوندر کور، جس نے بی جے پی ایم پی کنگنا رناوت کو گزشتہ ماہ چندی گڑھ ایئرپورٹ پر مبینہ طور پر تھپڑ مارا تھا، اب بھی معطل ہے اور اس کے خلاف محکمانہ انکوائری جاری ہے۔

کور کے خلاف تعزیرات ہند (آئی پی سی) کی دفعہ 323 (رضاکارانہ طور پر چوٹ پہنچانا) اور 341 (غلط طریقے سے روکنا) کے تحت مقدمہ درج کیا گیا تھا۔ سی آئی ایس ایف کانسٹیبل کو ابتدائی طور پر حراست میں لیا گیا تھا اور بعد میں کور کو معطل کر دیا گیا تھا جب کنگنا نے دہلی کے اندرا گاندھی بین الاقوامی ہوائی اڈے پر پہنچنے پر سی آئی ایس ایف حکام کو بتایا کہ اسے چندی گڑھ ہوائی اڈے پر ایک خاتون کانسٹیبل نے تھپڑ مارا اور اس کے ساتھ بدسلوکی کی، اس سے پہلے کہ وہ دہلی کے لیے پرواز میں سوار ہوئی۔

بی جے پی رکن پارلیمنٹ کنگنا رناوت نے اپنے ایکس ہینڈل پر اپ لوڈ کردہ ایک ویڈیو میں کہا تھا کہ"مجھے چہرے پر مارا گیا، گالی دی گئی۔ میں محفوظ ہوں لیکن پنجاب میں دہشت گردی کے بارے میں فکر مند ہوں، پنجاب میں دہشت گردی اور تشدد میں حیران کن اضافہ ہوا ہے"۔

کانسٹیبل، جو گزشتہ ڈھائی سال سے چندی گڑھ ایئرپورٹ پر ڈیوٹی پر تعینات تھی، اس واقعے کے بعد ٹیلی ویژن چینلز پر دیکھا گیا، جس میں کہا گیا کہ وہ کسان تحریک کے دوران کنگنا کے اس طرح کے بیانات سے پریشان ہے۔ کلوندر کور نے کہا تھا کہ " کنگنا ایک بیان دیا تھا کہ کسان 100 روپے کے لیے احتجاج میں بیٹھے ہیں، کیا وہ وہاں جا کر بیٹھیں گی؟ میری ماں وہاں بیٹھی تھی اور احتجاج کر رہی تھی جب انہوں نے یہ بیان دیا تھا‘‘۔ کنگنا رناوت نے دہلی اور ہریانہ میں کسانوں کے احتجاج پر کہا تھا یہ لوگ 100 روپے کے لئے احتجاج کرنے پہنچ گئے ہیں۔

واضح رہے کہ کلوندر کور کے کنگنا رناوت کو تھپڑ مارنے کے بعد مختلف قسم کے رد عمل سامنے آئے تھے جن میں بعض لوگوں نے سی آئی ایس ایف کانسٹبل خاتون کی ستائش کی تھی اور بعض لوگوں نے انہیں پرکشش ملازمت کی پیشکش بھی کی تھی۔