తెలంగాణ శాసనమండలి ప్రతిపక్షనేతగా మధుసూధనాచారి

Telangana Council LOP Madhusudana Chary : శాసనమండలిలో ప్రతిపక్షనేతగా సిరికొండ మధుసూధనాచారి నియమితులయ్యారు. ఎమ్మెల్సీ మధుసూధనాచారిని ప్రతిపక్షనేతగా నియమించాలని భారత రాష్ట్ర సమితి గతంలో కోరింది. ఈ మేరకు బీఆర్ఎస్​ అధినేత, శాసనసభాపక్ష నేత కేసీఆర్ మండలి ఛైర్మన్ గుత్తా సుఖేందర్​ రెడ్డికి లేఖ రాశారు. ఆ లేఖను పరిగణనలోకి తీసుకున్న మండలి ఛైర్మన్, ప్రతిపక్ష నేతగా మధుసూధనాచారిని నియమిస్తూ నిర్ణయం తీసుకున్నారు. అందుకు అనుగుణంగా శాసనసభ కార్యదర్శి నరసింహాచార్యులు బులెటిన్ జారీ చేశారు. ప్రతిపక్ష నేత నియామకం ఇవాళ్టి నుంచే అమల్లోకి వస్తుందని అందులో పేర్కొన్నారు.