Animals Vehicle Accident in Nirmal : వన్య ప్రాణులను తరలిస్తున్న వాహనం ప్రమాదానికి గురైన ఘటన నిర్మల్ జిల్లాలో చోటు చేసుకుంది. అదృష్టవశాత్తు అందులోని జీవాలన్నీ సురక్షితంగా బయటపడ్డాయి. బిహార్‌ రాజధాని పట్నాలోని సంజయ్‌గాంధీ జాతీయ జూపార్కు నుంచి వివిధ రకాల వన్యప్రాణులను రెండు వాహనాల్లో బెంగళూరులోని బన్నేర్‌గట్ట జాతీయ జూపార్కుకు తరలిస్తుండగా ఈ ప్రమాదం జరిగింది. వీటిలో ప్రముఖ ఘరియాల్‌ జాతికి చెందిన మొసళ్లు, అరుదైన తెల్ల పులి ఉన్నాయి.
బుధవారం నిర్మల్ జిల్లా మామడ మండలం మొండిగుట్ట గ్రామానికి చేరుకున్నాక రెండు వాహనాల్లో ఒకటి అదుపు తప్పి బోల్తా పడింది. 8 మొసళ్లలో రెండు బయటపడగా, అవి తప్పించుకుపోకుండా స్థానిక అటవీ అధికారులు రక్షణ చర్యలు చేపట్టారు. వెంటనే మరో వాహనాన్ని సిద్ధం చేసి, అన్నింటినీ అందులో తరలించారు.
