మూడేళ్ల చిన్నారిపై వీధికుక్కల దాడి - ఆసుపత్రికి తరలింపు

Dogs Attack On 3 years Old Girl :మూడేళ్ల చిన్నారిపై వీధికుక్కలు దాడిచేసిన ఘటన సిద్దిపేట జిల్లా అక్బర్‌పేట భూంపల్లి మండలం బేగంపేట గ్రామంలో చోటుచేసుకుంది. వివరాల్లోకి వెళితే గ్రామానికి చెందిన దేవేందర్‌ లాస్యల కుమార్తె హన్సిత(3). శ్రీకృష్ణాష్టమి సందర్భంగా పాఠశాలకు సెలవు ప్రకటించడంతో చిన్నారి తన స్నేహితులతో ఆడుకుంటుండగా వీధి కుక్కలు ఒక్కసారిగా బాలికపై దాడికి పాల్పడ్డాయి. దీంతో మిగిలిన పిల్లలు కూడా అక్కడి నుంచి వెళ్లిపోయారు.

దీంతో హన్సికపై కుక్కలు విచక్షణారహితంగా దాడి చేశాయి. ఈ ఘటనలో బాలికకు తీవ్ర గాయాలయ్యాయి. ఆమెను చికిత్స నిమిత్తం 108 వాహనంలో సిద్దిపేట ప్రభుత్వ ఆసుపత్రికి తరలించారు. అక్కడి నుంచి మెరుగైన వైద్యంకోసం హైదరాబాద్‌లోని నిమ్స్‌కు తీసుకువెళ్లారు. తమ గ్రామంలో కుక్కల బెడద నివారించడానికి అధికారులు ప్రత్యేక చర్యలు చేపట్టాలని గ్రామవాసులు ఆందోళన చేపట్టారు.