కేంద్రం కీలక నిర్ణయం - 730 రేడియో స్టేషన్ల ఏర్పాటుకు గ్రీన్ సిగ్నల్

Central Govt Radio Stations News :దేశంలో 234 నగరాల్లో 730 ఎఫ్ఎం రేడియో స్టేషన్ల ఏర్పాటుకు కేంద్రం పచ్చజెండా ఊపింది. తెలంగాణ నుంచి 31 స్టేషన్లకు అవకాశం దక్కింది. ఉపాధి కల్పన దిశగా కేంద్రం ఈ మేరకు నిర్ణయం తీసుకుంది. కేంద్ర కేబినెట్‌ సమావేశంలో ఈ మూడోదశ ప్రాజెక్టుకు ఆమోదముద్ర పడింది.

తెలంగాణ నుంచి అవకాశం దక్కిన 31 స్టేషన్​లలో ఆదిలాబాద్, కొత్తగూడెం వంటి వెనుకబడిన జిల్లాలతో పాటు కరీంనగర్, ఖమ్మం, మహబూబ్‌నగర్, మంచిర్యాల, నల్గొండ, రామగుండం, సూర్యాపేట జిల్లాలు ఈ జాబితాలో ఉన్నాయి. నిజామాబాద్‌కు 4 ఛానల్స్‌ను కేటాయించారు. వీటిల్లో వెనుకబడిన, మావోయిస్టు ప్రభావిత ప్రాంతాలకు పెద్దపీట వేసినట్లు తెలుస్తోంది. వీటి ఏర్పాటు వల్ల ప్రాంతీయ భాషలను ఆయా ప్రాంత ప్రజలకు అందించేందుకు వీలుంటుంది. దీంతో పాటు ప్రభుత్వ పథకాలను మరింత సమర్థవంతంగా క్షేత్రస్థాయి వరకూ చేర్చేందుకు వీలవుతుంది.