ఏసీ రూముల్లో కూర్చునే మీకు మా సమస్యలు ఎలా తెలుస్తాయి - కొప్పుల ఈశ్వర్​కు నిరసన సెగ - Woman Workers Fires On koppula - WOMAN WORKERS FIRES ON KOPPULA

Singareni Woman Workers Fires On koppula Eswar : పెద్దపల్లి జిల్లా గోదావరిఖనిలోని సింగరేణి బొగ్గు బావుల వద్దకు ఎన్నికల ప్రచారానికి వెళ్లిన బీఆర్ఎస్ నాయకులకు నిరసన సెగ తగిలింది. ఆ పార్టీ అభ్యర్థి కొప్పుల ఈశ్వర్, మాజీ ఎమ్మెల్యే కోరుకంటి చందర్, తదితరులు జీడీకే వన్ ఇంక్ లైన్ వద్దకు ప్రచారానికి వెళ్లగా, మహిళా కార్మికులు తీవ్ర అసంతృప్తి వ్యక్తం చేశారు. మాజీ మంత్రి కొప్పుల ఈశ్వర్ బంధువులను గనుల్లోకి దింపకుండా, పై విధులు అప్పగించడం పట్ల తీవ్ర అసంతృప్తి వ్యక్తం చేశారు. మహిళా కార్మికులను మూకుమ్మడిగా వర్క్ షాప్ నుంచి ట్రాన్స్​ఫర్​ చేసినప్పుడు ఎందుకు మాట్లాడలేదని నాయకులను నిలదీశారు.

కొంతమంది మహిళా కార్మికులు పని చేయలేక కళ్లు తిరిగి పడిపోతున్నారని ఆవేదన వ్యక్తం చేశారు. ఆ ప్రశ్నలను తమను ఎందుకు అడుగుతున్నారని కార్మికులను నాయకులు ఎదురు ప్రశ్నించడంతో వాగ్వాదం మరింత పెరిగింది. ఆ బదిలీలకు తమకు సంబంధం లేదని నచ్చజెప్పే ప్రయత్నం చేసినా వినలేదు. తమకు అంతా తెలుసని, గతంలో అధికారంలో ఉన్నది మీరే కదా అంటూ ఆగ్రహం వ్యక్తం చేశారు. మధ్యలో కలగజేసుకున్న కార్మిక నాయకులు నచ్చచెప్పే ప్రయత్నం చేస్తుండగా, ఏసీ రూముల్లో కూర్చునే మీకు మా సమస్యలు ఎలా తెలుస్తాయని ఎదురు ప్రశ్నించారు. దీంతో గొడవ మరింత ముదరగా, పోలీసులు చేరుకొని నచ్చజెప్పి వారిని అక్కడి నుంచి పంపించారు.