టీడీపీ సానుభూతిపరులపై పోలీసుల దాష్టీకం- నిర్బంధించి రెండ్రోజుల పాటు చిత్రహింసలు - Police Attack on TDP Sympathizers

Police Attack on TDP Sympathizers: పల్నాడు జిల్లా దాచేపల్లి పోలీసులు తెలుగుదేశం సానుభూతిపరులను నిర్బంధించి విపరీతంగా కొట్టిన విషయం ఆలస్యంగా వెలుగుచూసింది. మాచవరం మండలం మోర్జంపాడుకు చెందిన టీడీపీ  సానుభూతిపరులు ఈ నెల 14న దాచేపల్లి వైపు వెళ్తుండగా పోలీసులు అడ్డుకుని స్టేషన్​కు తీసుకెళ్లారు. వారిపై విచక్షణరహితంగా లాఠీలతో విరుచుకుపడినట్లు బాధితులు తెలిపారు. బాధితుల్లో అనిల్ అనే ఐటీ ఉద్యోగి కూడా ఉన్నారు. రెండ్రోజుల పాటు చిత్రహింసలకు గురిచేసి ఈ నెల 16న సత్తెనపల్లి కోర్టులో ప్రవేశపెట్టారు.

పోలీసులు తమను చిత్రహింసలకు గురిచేసిన విషయం బాధితులు న్యాయమూర్తి దృష్టికి తీసుకెళ్లగా గుంటూరు జీజీహెచ్​లో పరీక్షలు నిర్వహించాలని ఆదేశించారు. బాధితులను ఆసుపత్రికి తీసుకువచ్చిన పోలీసులు వారికి ఎలాంటి గాయాలు లేవని నివేదిక ఇవ్వాలని వైద్యులపై ఒత్తిడి తెచ్చారు. దీనికి వైద్యులు అంగీకరించలేదు. విషయం తెలిసి జీజీహెచ్​కు వెళ్ళిన మీడియా ప్రతినిధుల్ని కూడా పోలీసులు అడ్డుకోవాలని ప్రయత్నించారు. కరుడుగట్టిన వైఎస్సార్సీపీ కార్యకర్తల కన్నా పోలీసులే దారుణంగా వ్యవహరించారని బాధితులు ఆవేదన వెలిబుచ్చారు. మోర్జంపాడు ఎంపీటీసీపై దాడి జరిగిందనే విషయం తెలిసి ఆసుపత్రికి వెళ్తుంటే పోలీసులు అరెస్టు చేశారని ఆరోపించారు.