మీ క్రెడిట్ కార్డు రివార్డు పాయింట్లు త్వరలో ఎక్స్‌పైర్ అవున్నాయా? - ఇలా వాడితే ఫుల్​ బెనిఫిట్స్​!

ఒక్కో కార్డులో ఒక్కో విధమైన ఎక్స్‌పైరీ తేదీలు- సకాలంలో రీడీమ్ చేసుకుంటే ఆర్థిక ప్రయోజనం

Credit Card Reward Points : గత కొన్నేళ్లలో మనదేశంలో క్రెడిట్ కార్డుల వినియోగం బాగా పెరిగిపోయింది. చాలామంది క్రెడిట్ కార్డులతో ప్రతినెలా విద్యుత్, టెలిఫోన్, వైఫై, నల్లా, ఇంటి పన్ను వంటివన్నీ కట్టేస్తుంటారు. మరుసటి బిల్లింగ్ తేదీ వచ్చేలోగా ఆ మొత్తాన్ని క్రెడిట్ కార్డులోకి సర్దుబాటు చేస్తుంటారు. ఈ విధంగా పొదుపుగా క్రెడిట్ కార్డును వాడుకుంటే ఆకర్షణీయమైన రివార్డ్ పాయింట్స్ వస్తాయి. వాటిని రీడీమ్ చేసుకొని క్యాష్‌బ్యాక్‌‌, డిస్కౌంట్, కాంప్లిమెంటరీ ట్రావెల్ వంటి ప్రయోజనాలను యూజర్లు పొందొచ్చు. చాలామంది క్రెడిట్ కార్డుల వినియోగదారులు రివార్డు పాయింట్లు ఎక్స్‌పైరీ గురించి ఆందోళనగా ఉంటారు. వాటిని ఎలా యాక్టివ్​గా ఉంచుకోవాలో ఇప్పుడు తెలుసుకుందాం.

క్రెడిట్ కార్డ్ రివార్డ్ పాయింట్స్ ఏమిటి?
మనం క్రెడిట్ కార్డు ద్వారా ఎంతమేర ఖర్చులు/చెల్లింపులు చేస్తామో అంతమేర రివార్డు పాయింట్లు వస్తుంటాయి. ఈ రివార్డు పాయింట్లను వివిధ అవసరాల కోసం రీడీమ్ చేసుకొని వాడుకోవచ్చు. ట్రావెల్ బుకింగ్స్, మర్చండైజ్‌లు, క్యాష్ బ్యాక్‌లను పొందే క్రమంలో వీటిని రీడీమ్ చేసేయొచ్చు. కొన్నిసార్లు మనకు వచ్చే రివార్డు పాయింట్లకు ఎక్స్‌పైరీ తేదీ ఉంటుంది. ఆలోగా వాటిని రీడీమ్ చేయాలి. అందుకే రివార్డు పాయింట్ల ఎక్స్‌పైరీ తేదీలను కూడా మనం చెక్ చేసుకోవాలి. తద్వారా వాటి నుంచి లభించే ప్రయోజనాలు చేజారవు.

రివార్డు పాయింట్లు ఎందుకు ఎక్స్‌పైర్ అవుతాయి?
బ్యాంకులే రివార్డు పాయింట్లకు ఎక్స్‌పైరీ తేదీలను కేటాయిస్తాయి. వాటిని సాధ్యమైనంత త్వరగా రీడీమ్ చేసుకునేలా క్రెడిట్ కార్డుల యూజర్లను ప్రోత్సహించే ఉద్దేశంతో ఈ తేదీలను నిర్ణయిస్తాయి. యూజర్లకు రివార్డు పాయింట్ల కేటాయింపు వల్ల బ్యాంకులపైనే అదనపు ఆర్థిక భారం పడుతుంది. అయితే వాటిని రీడీమ్ చేసుకునే క్రమంలో యూజర్లు చేసే లావాదేవీలు బ్యాంకులకు లాభాలను అందిస్తాయి.

రివార్డు పాయింట్ల ఎక్స్‌పైరీ పాలసీలు
రివార్డు పాయింట్ల ఎక్స్‌పరీ పాలసీలు క్రెడిట్ కార్డు రకాన్ని బట్టి, బ్యాంకును బట్టి మారిపోతుంటాయి. అయితే కొన్ని సర్వ సాధారణమైన ఎక్స్‌పైరీ పాలసీల గురించి మనం తెలుసుకుందాం.

• నిర్దిష్ట కాల పరిమితి : కొన్ని క్రెడిట్ కార్డులలో వచ్చే రివార్డు పాయింట్లు రెండేళ్ల నుంచి మూడేళ్ల వరకు ఎక్స్‌పైర్ కావు. అప్పటివరకు కులాసాగా వాటిని రీడీమ్ చేసుకోవచ్చు.
• అకౌంటు యాక్టివిటీ ముగిసేదాకా : క్రెడిట్ కార్డు అకౌంటు క్రియాశీలంగా ఉన్నంత వరకు కొన్ని రివార్డు పాయింట్లు ఎక్స్‌పైర్ కావు. అకౌంటు యాక్టివిటీ ఆగిపోయిన నిర్దిష్ట కాలం తర్వాత రివార్డు పాయింట్లు ఎక్స్‌పైర్ అవుతాయి.
• బ్రాండ్‌‌లతో భాగస్వామ్యం ఉన్నంత వరకు : క్రెడిట్ కార్డులు జారీ చేసేందుకు బ్యాంకులు కొన్ని బ్రాండెడ్ ఉత్పత్తుల కంపెనీలతో జట్టు కడుతుంటాయి. అలాంటి కో బ్రాండెడ్ క్రెడిట్ కార్డులలో వచ్చే రివార్డు పాయింట్లు బ్యాంకు, బ్రాండెడ్ కంపెనీ మధ్య ఒప్పందం అమల్లో ఉన్నంత వరకు ఎక్స్‌పైర్ కావు.
• రిజర్వ్ బ్యాంక్ నియమాలు : బ్యాంకులు, ఆర్థిక సంస్థలకు క్రెడిట్ కార్డుల విషయంలో రిజర్వ్ బ్యాంక్ ఎప్పటికప్పుడు నియమ నిబంధనలను జారీ చేస్తుంటుంది. ఆర్‌బీఐ నుంచి వచ్చే విధివిధానాలను అమలు చేసే క్రమంలో రివార్డు పాయింట్లపై బ్యాంకులు నిర్ణయాలను మార్చే అవకాశం ఉంటుంది. అటువంటి సమయాల్లో రివార్డు పాయింట్ల ఎక్స్‌పరీ తేదీలు ముందుకు, వెనక్కు జరగొచ్చు.
• జీవితకాల పరిమితి : కొన్ని రకాల ప్రీమియం క్రెడిట్ కార్డులు తీసుకుంటే చాలా ప్రయోజనం ఉంటుంది. వాటిలో వచ్చే రివార్డు పాయింట్లు జీవిత కాలం పాటు ఎక్స్‌పైర్ కావు. అయితే ఈ కార్డుల వార్షిక ఫీజు చాలా ఎక్కువగా ఉంటుంది.