AP Man Invents Piracy Secured Board: ప్రస్తుత రోజుల్లో థియేటర్లలో ఏదైనా కొత్త సినిమా రిలీజ్ అయితే వెంటనే దాని పైరసీ కాపీ పలు వెబ్‌సైట్లలో దర్శనమిస్తోంది. తద్వారా కోట్ల రూపాయల వెచ్చింది సినిమాలు తెరకెక్కించిన నిర్మాతలకు నష్టం వాటిల్లుతోంది. పైరసీని ఎలా అయినా అడ్డుకునేందుకు సినీ నిర్మాతలు ఎన్ని ప్రయత్నాలు చేసినా ఉపయోగం లేకుండా పోయింది. అయితే దీనిని దీన్ని అడ్డుకునేందుకు ఆంధ్రప్రదేశ్కి చెందిన పి.వినోద్కుమార్ అనే వ్యక్తి ఓ ప్రత్యేక బోర్డును తయారు చేశారు. దాని పేరే పైరసీ సెక్యూర్డ్ బోర్డ్. దీనికి తాజాగా ఇంటలెక్చువల్‌ ప్రాపర్టీ ఇండియా పేటెంట్‌ సైతం ఇచ్చింది.
ఇక వీడియో రికార్డు అవ్వదు: గతంలో యూఎస్లోని ఫాక్స్‌ స్టూడియోస్‌ పైరసీని నియంత్రించేందుకు వాటర్‌మార్క్‌ టెక్నాలజీని తీసుకొచ్చింది. ఇంతకీ ఈ వాటర్‌మార్క్‌ టెక్నాలజీ ఏంటంటే, సినిమా జరుగుతున్న సమయంలో కొన్ని క్షణాలపాటు ఒక నెంబర్ వచ్చి వెళ్తుంది. తద్వారా పైరసీ కాపీలో రికార్టు అయ్యే ఆ నంబరు ఆధారంగా ఆ మూవీని ఎక్కడ కాపీ చేశారు. ఏ రోజు రికార్డు చేశారో ఈజీగా గుర్తించొచ్చు. అయితే ఇలా గుర్తించినా కూడా ఇంకా ఏమీ చేయలేకపోతున్నారని తెలుసుకున్న వినోద్కుమార్ పైరసీని అరికట్టేందుకు సరికొత్త బోర్డుని రూపొందించారు.
ఈ పైరసీ సెక్యూర్డ్ బోర్డుని 2016వ సంవత్సరంలో రూపొందించారు. దీన్ని థియేటర్లో తెరవెనుక సెట్ చేస్తే అందులో నుంచి వచ్చే ఐఆర్‌(Infrared) కిరణాల వలన వీడియో తీసినా రికార్డు అవ్వదు. అయితే దీనిపై అదే సంవత్సరం ఇంటలెక్చువల్‌ ప్రాపర్టీ ఇండియాకు పేటెంట్‌ కోసం అప్లై చేసినా కూడా ఇదే తరహా టెక్నాలజీతో తయారైన ప్రొటోటైప్‌లు ఇతర దేశాలలో ఉండటంతో పేటెంట్‌ లభించలేదు. తాజాగా దీనిని పేటెంట్‌ లభించింది.
ఎవరీ వినోద్ కుమార్: ఆంధ్రప్రదేశ్‌లోని అనకాపల్లి జిల్లాకి చెందిన వినోద్కుమార్ 10వ తరగతి నుంచే వెబ్‌ డెవలప్‌మెంట్‌ కోర్సులపై పట్టు సాధించారు. బీటెక్, ఎంబీఏ పూర్తి చేశాక పలు కంపెనీల్లో పనిచేశారు. 2018లో హైదరాబాద్‌ వచ్చిన వినోద్ కుమార్ అనంతరం అక్కడే స్థిరపడ్డారు. ఉద్యోగం చేస్తూనే బధిరులకు తేలిగ్గా సమాచారం అందించే పరికరాన్ని సైతం రూపొందారు. దీనికి సైతం పేటెంట్‌ దక్కింది. ప్రస్తుత పైరసీ సెక్యూర్డ్ బోర్డుపై తనకు 20 సంవత్సరాల గడువుతో పేటెంట్‌ దక్కిందని వినోద్కుమార్ తెలిపారు.
