దళితుల పట్ల కాంగ్రెస్​ ముసలి కన్నీరు కారుస్తోంది : కె.లక్ష్మణ్ - MP Laxman Visit At Musheerabad

MP Laxman Visit At Musheerabad : రాష్ట్ర రాజధానిలో పేదలు, బడుగు బలహీన వర్గాలు నివసించే ప్రాంతాల్లో అభద్రతా భావం నెలకొందని రాజ్యసభ సభ్యులు కె.లక్ష్మణ్ ఆవేదన వ్యక్తం చేశారు. హైదరాబాద్​లోని ముషీరాబాద్ స్వామి వివేకానంద నగర్​లో రెవెన్యూ, జీహెచ్ఎంసీ ఇటీవల 23 ఇళ్లను కూల్చివేసింది. తమకు న్యాయం చేయాలని కోరుతూ బాధితులు చేపట్టిన నిరసన దీక్ష శిబిరాన్ని లక్ష్మణ్, బీజేపీ నాయకులు వినయ్ కుమార్, రమేశ్​ రాముతో పాటు పలువురు సీపీఎం నాయకులు సందర్శించి బాధితులను పరామర్శించారు. కోర్టు ఆదేశాల నెపంతో 70 ఏళ్లుగా నివాసముంటున్న స్థానికులకు ఎలాంటి ప్రత్యామ్నాయం చూపకుండా ప్రభుత్వం అమానవీయంగా వ్యవహరించిందని ఆయన మండిపడ్డారు.  

Laxman Fires On Congress : దళితుల పట్ల ముసలి కన్నీరు కార్చే ఈ ప్రభుత్వం, రాజధాని నడిబొడ్డులో ఇళ్లు కూల్చివేయడం ఎంతవరకు సమంజసమని ఆయన ప్రశ్నించారు. భవిష్యత్తు ఏ విధంగా ఉంటుందో ఈ సంఘటనతో అర్థమవుతోందన్నారు. ఎవరి కోసం ఈ చర్యలు తీసుకున్నారో చెప్పాలని నిలదీశారు. రాష్ట్ర ముఖ్యమంత్రి రేవంత్​ రెడ్డి బాధితులకు పునరావాసం కల్పించాలని డిమాండ్ చేశారు. లేనిపక్షంలో ఆందోళన తీవ్రతరం చేస్తామని హెచ్చరించారు.