అక్రమంగా మెఫ్టెర్మైన్‌ సల్ఫేట్‌ ఇంజెక్షన్లను విక్రయిస్తున్న ఇద్దరు అరెస్ట్ - Hyderabad Mephentermine Injections

Mephentermine Sulfate Injections Case In Hyderabad : మెఫ్టెర్మైన్‌ సల్ఫేట్‌ ఇంజెక్షన్లను అధిక ధరకు అక్రమంగా విక్రయిస్తున్న ఇద్దరిని శంషాబాద్‌ పోలీసులు, స్పెషల్‌ ఆపరేషన్‌ టీమ్‌ సంయుక్తంగా అరెస్టు చేశారు. వారి నుంచి 30 మెఫ్టైర్మైన్‌ సల్ఫేట్‌ ఇంజెక్షన్స్, 4 సిరంజీలు, 3 చరవాణులు, రూ.3 వేలు పోలీసులు స్వాధీనం చేసుకున్నారు. మొత్తంగా వీటి విలువ రూ. 2లక్షల 41 వేలు ఉంటుందని పోలీసులు తెలిపారు. 

పోలీసులు తెలిపిన వివరాల ప్రకారం : హైదరాబాద్‌ శివారులోని పహాడి షరీఫ్‌కు చెందిన మహ్మద్‌ అజాజ్‌ మొహియుద్దిన్‌ గతంలో జిమ్‌ వర్కౌట్‌ చేసే సమయంలో ఈ ఇంజెక్షన్‌ గురించి తెలుసుకున్నాడు. జిమ్‌ వర్కట్‌ చేసే వారిలో కండరాల అభివృద్ధికి ఇవి బాగా పని చేస్తాయని చెప్పి వారికి నిందితులు వీటిని అమ్ముతున్నారని పోలీసులు తెలిపారు. 200 రూపాయల విలువైన వీటిని రూ. 2వేలకు అమ్ముతున్నారని వెల్లడించారు. మరోవైపు జిమ్​ చేసే వారికి ఈ ఇంజెక్షన్లు వాడితే వీటి వల్ల సైడ్‌ ఎఫెక్ట్‌లు కచ్చితంగా ఉంటాయని నిపుణులు చెబుతున్నారని, అందుకే వీటిని వినియోగించకూడదని పోలీసులు సూచించారు.