భక్తజనసంద్రమైన యాదాద్రి దేవాలయం- ఉచిత దర్శనానికి 2 గంటల సమయం - Yadadri Temple Rush

Huge Rush At Yadadri Temple  : రాష్ట్రంలో ప్రముఖ పుణ్యక్షేత్రమైన యాదాద్రి శ్రీ లక్ష్మీ నరసింహస్వామి దేవాలయానికి భక్తుల తాకిడి పెరిగింది. ఆదివారం సెలవుదినం కావడంతో స్వామివారిని దర్శించుకునేందుకు భక్తులు విశేషంగా తరలివచ్చారు. ఆలయ పరిసరాలన్నీ భక్తులతో కిటకిటలాడుతున్నాయి. శ్రీ లక్ష్మీ నరసింహస్వామి వారి దర్శనానికి భక్తులు క్యూలైన్లో భక్తులు బారులు తీరారు. ఆలయంలో మొక్కు కల్యాణంలో పాల్గొని మొక్కులు చెల్లించుకున్నారు.  

భక్తుల రద్దీ అధికంగా ఉండటంతో స్వామివారి ఉచిత ప్రవేశ దర్శనానికి దాదాపు రెండు గంటల సమయం పడుతుంది. ప్రత్యేక దర్శనానికి దాదాపు గంట సమయం పడుతుంది. ప్రసాద విక్రయశాల, సత్యనారాయణ స్వామి వ్రత మండపం, కొండక్రింద విష్ణుపుష్కరణి, కారు పార్కింగ్, బస్​స్టాండ్​లో భక్తుల సందడి నెలకొంది. ఈ నేపథ్యంలో భక్తులకు ఎలాంటి ఇబ్బందులు కలగకుండా ఆలయ అధికారులు చర్యలు చేపట్టారు. ఆలయ అర్చకులు స్వామివారికి ప్రత్యేక పూజలు నిర్వహించారు. మరోవైపు ఆలయ భద్రతకు సంబంధించి అధికారులుతనిఖీని ముమ్మరం చేసేందుకు ఆలయం వద్ద  ప్రత్యేక పరికరాలను కొద్ది రోజుల క్రితమే ఏర్పాటు చేశారు.