LIVE : ఇందిరమ్మ ఇళ్ల సర్వే మొబైల్ యాప్ ఆవిష్కరణలో సీఎం రేవంత్​ రెడ్డి - INDIRAMMA HOUSES MOBILE APP LIVE

Indiramma Houses Mobile APP : ఇందిరమ్మ ఇళ్ల లబ్ధిదారుల ఎంపికలో కీలక పాత్ర పోషించే మొబైల్​ యాప్​ను నేడు ముఖ్యమంత్రి రేవంత్​ రెడ్డి ప్రారంభించారు. కేంద్ర గృహ నిర్మాణ పథకాలకు అనుగుణంగా రాష్ట్ర ప్రభుత్వం ఈ యాప్​ను రూపొందించింది. ఇది వరకే మహబూబ్​నగర్​, నిజామాబాద్​, భద్రాద్రి కొత్తగూడెం, మెదక్​ జిల్లాల్లో ప్రయోగాత్మకంగా ఈ యాప్​ను పరిశీలించారు. రేపటి నుంచి రాష్ట్రవ్యాప్తంగా లబ్ధిదారుల ఎంపిక ప్రక్రియ ప్రారంభం కానుంది. ప్రజాపాలన దరఖాస్తుల ఆధారంగా ఇంటింటికీ వెళ్లి వివరాలను సేకరించి యాప్​లో నమోదు చేస్తారు. దరఖాస్తుదారుని పేరు, ఆధార్​ కార్డు, రేషన్​ కార్డు, ఆర్థిక పరిస్థితి, ఇళ్లు నిర్మించనున్న స్థలం, ఇతర వివరాలకు సంబంధించిన సుమారు 35 ప్రశ్నలు ఉంటాయి. ఆ వివరాల ఆధారంగా అర్హులను విడతల వారీగా గ్రామసభల ద్వారా ఇందిరమ్మ కమిటీలు ఎంపిక చేయనున్నాయి. లబ్ధిదారుల ఎంపికలో దివ్యాంగులు, ఒంటరి మహిళలు, అనాథలు, వితంతువులు, ట్రాన్స్​జెండర్లు, సఫాయి కార్మాచారులకు ప్రాధాన్యమివ్వనున్నట్లు ప్రభుత్వం వెల్లడించింది.