యాదాద్రిలో ఘనంగా ముగిసిన వార్షిక బ్రహ్మోత్సవాలు- 108 కలశాలతో ప్రత్యేక పూజలు - Brahmotsavams In Yadadri 2024 - BRAHMOTSAVAMS IN YADADRI 2024

Brahmotsavams In Yadadri : తెలంగాణాలోని ప్రముఖ దేవాలయమైన యాదాద్రి శ్రీ లక్ష్మీ నరసింహస్వామి వారి బ్రహ్మోత్సవాలు ఘనంగా ముగిశాయి. ఈనెల 11వ తేదీన ప్రారంభమైన బ్రహ్మోత్సవాలు మార్చి 21(నేటి) వరకు జరిగాయి. అష్టోత్తర శతఘటాభిషేకంతో వేదపండితులు బ్రహ్మోత్సవాలను ఘనంగా ముగించారు. ఈ సందర్భంగా స్వామివారికి ప్రత్యేక పూజలను నిర్వహించారు ఆలయ అర్చకులు. 

ఆలయంలో 108 కలశాలను వరుసగా పేర్చి వేదపండితుల మంత్రోచ్ఛారణల మధ్య, మంగళ వాయిద్యాల నడుమ కలశాలకు ప్రత్యేక పూజలు చేశారు. అనంతరం 108 కలశాల్లో ఉన్న జలంతో స్వామివారికి అర్చనాభిషేకాలు నిర్వహించి స్వామి అమ్మవార్లను గర్భాలయంలోకి తీసుకెళ్లారు. అంతకు ముందు దాదాపు 2 గంటల పాటు అర్చకులు శాస్త్రోత్తంగా హోమాన్ని నిర్వహించారు. 11 రోజులుగా అంగరంగ వైభవంగా జరుగుతున్న బ్రహ్మోత్సవాలకు గురువారం నాడు ముగింపు పలికారు. ఈ బ్రహ్మోత్సవాలకు వివిధ ప్రాంతాల నుంచి భక్తులు అధిక సంఖ్యలో తరలివచ్చారు. ఆలయ అధికారులు భక్తులకు ఎలాంటి ఇబ్బందులు కలగకుండా ఏర్పాట్లు చేశారు.