వైభవంగా గోవిందరాజస్వామి రథోత్సవం- మాఢవీధుల్లో రథం లాగేందుకు పోటెత్తిన భక్తులు - GOVINDARAJA CHARIOT FESTIVAL
By ETV Bharat Andhra Pradesh Team
Published : May 23, 2024, 2:27 PM IST
Brahmotsavam of Sri Govindaraja Swami in Tirupati: తిరుపతిలో శ్రీ గోవిందరాజ స్వామి బ్రహ్మోత్సవాలు కన్నుల పండువగా సాగాయి. ఎనిమిదో రోజు ఉత్సవాల్లో భాగంగా శ్రీదేవి, భూదేవి సమేత స్వామివారి రథోత్సవం అంగరంగ వైభవంగా జరిగింది. ఈ ఉత్సవంలో పెద్ద సంఖ్యలో భక్తులు పాల్గొన్నారు. మాడవీధుల్లో స్వామివారి రథం లాగేందుకు భక్తులు పోటెత్తారు. కోలాటాలు, మంగళ వాయిద్యాల నడుమ స్వామివారి ఊరేగింపు (Chariot Festival) నిర్వహించారు. స్వామివారి దర్శనం కోసం వేలాది మంది భక్తులు తరలివచ్చారు. మాడవీధులలో ఊరేగుతున్న స్వామి, అమ్మవార్లను భక్తులు దర్శించుకుని మొక్కులు చెల్లించుకున్నారు. రాత్రి స్వామివారికి అశ్వవాహన సేవ జరగనుంది. స్వామివారి ఊరేగింపుతో ఆలయ ప్రాంగణమంతా సందడి వాతావరణం నెలకొంది.
బ్రహ్మోత్సవాల్లో భాగంగా బుధవారం ఉదయం సూర్యప్రభ, రాత్రి చంద్రప్రభ వాహనాలపై శ్రీ గోవిందరాజ స్వామి భక్తులకు అభయ మిచ్చారు. మంగళ వాయిద్యాలు, భజనలు, కోలాటాల నడుమ ఆలయ మాడవీధుల్లో కోలాహలంగా వాహన సేవలు జరిగాయి. పెదజీయర్ స్వామి, చిన్నజీయర్స్వామి తదితరులు ఈ కార్యక్రమంలో పాల్గొన్నారు.