కేబుల్ బ్రిడ్జిపై బర్త్​డే వేడుకలు - వివాదంలో చిక్కుకున్న మాదాపూర్ సీఐ - Madhapur CI involved in controversy - MADHAPUR CI INVOLVED IN CONTROVERSY

Madhapur CI Involved In Controversy : హైదరాబాద్ మాదాపూర్ సీఐ గడ్డం మల్లేష్ వివాదంలో చిక్కుకున్నారు. ఇటీవల కేబుల్ బ్రిడ్జిపై నిర్వహించిన ఓ పుట్టినరోజు వేడుకల్లో సీఐ పాల్గొనడం సోషల్ మీడియాలో వైరల్​గా మారింది. కేబుల్ బ్రిడ్జిపై ఎలాంటి బర్త్​డే పార్టీలు నిర్వహించరాదని, ఎవరైనా అలా చేస్తే చర్యలు తీసుకుంటామని కొద్ది రోజుల క్రితం సదరు సీఐ హెచ్చరించారు. కాగా ఈ వ్యవహారంపై పోలీసు ఉన్నతాధికారులు విచారణకు ఆదేశించారు.  

ఇదీ జరిగింది
పటాన్​చెరు ట్రాఫిక్ ఇన్​స్పెక్టర్ శ్రవణ్ పుట్టిన రోజు వేడుకల సందర్భంగా దుర్గం చెరువు తీగల వంతెనపై బర్త్​డే పార్టీ జరిగింది. ఈ వేడుకల్లో మాదాపూర్ సీఐ మల్లేష్ సహా, మరో సైబరాబాద్ ఇన్​స్పెక్టర్ పాల్గొన్నారు. కాగా ఇటీవల కేబుల్ బ్రిడ్జిపై బర్త్ డే పార్టీలు నిషేధమని ఇలా అసౌకర్యం కలిగిస్తే చర్యలు తీసుకుంటామని మాదాపూర్ ఇన్​స్పెక్టర్ తెలిపారు. అయితే కేబుల్ వంతెన ఫుట్​పాత్​పై కేక్​ కట్ చేస్తున్న దృశ్యాలు వైరల్​గా మారాయి. రూల్స్ ప్రజలకు మాత్రమేనని పోలీసులకు వర్తించదంటూ నెటిజన్లు ట్రోల్స్ చేస్తున్నారు. కాగా దీనిపై స్పందించిన మాదాపూర్ సీఐ తాము ఫుట్​పాత్​పై మాత్రమే ఉన్నామని రోడ్​పై కాదని తెలిపారు. నెటిజన్లు సైతం ఈ విషయాన్ని హైదరాబాద్ సీపీకి ట్యాగ్ చేయడంతో అధికారులు స్పందించారు. ఈ ఘటనపై మాదాపూర్ డీసీపీ వినీత్ స్పందించారు. కేబుల్ వంతెనపై బర్త్​ డే వేడుకల అంశంపై సమగ్ర విచారణకు ఆదేశించారు. నివేదిక వచ్చిన అనంతరం తదుపరి చర్యలు తీసుకుంటామన్నారు.