ఈవీ రంగంపై కేంద్రం వరాల జల్లు- ఇకపై తగ్గనున్న ఎలక్ట్రిక్ కార్లు, బైక్​లు, ఫోన్​ల ధరలు!

ఈవీ బ్యాటరీ రంగానికి ప్రభుత్వ ప్రోత్సాహం- కీలక ఖనిజాలపై కస్టమ్ డ్యూటీని ఎత్తేసిన కేంద్రం!

Union Budget 2025:భారత్​లో ఎలక్ట్రిక్ మార్కెట్​ను ప్రోత్సహించేందుకు కేంద్ర ప్రభుత్వం కీలక నిర్ణయం తీసుకుంది. ఈ మేరకు లిథియం బ్యాటరీలు, సంబంధిత రంగాల ఉత్పత్తిని పెంచేందుకు కేంద్ర ఆర్థిక మంత్రి నిర్మలా సీతారామన్ 2025-26 కేంద్ర బడ్జెట్‌లో గణనీయమైన పన్ను మినహాయింపులను ప్రకటించారు. స్థానిక తయారీని పెంచడం, దిగుమతులపై ఆధారపడటాన్ని తగ్గించడం, ఎలక్ట్రిక్ వాహనాలు (EV), ఎలక్ట్రానిక్స్​ను మరింత సరసమైనవిగా మార్చడమే లక్ష్యంగా కేంద్ర ప్రభుత్వం ఈ నిర్ణయం తీసుకుంది.

లోక్​సభలో శనివారం ప్రవేశపెట్టిన బడ్జెట్​లో కేంద్ర ప్రభుత్వం కోబాల్డ్, లిథియం-అయాన్ బ్యాటరీ స్క్రాప్, లెడ్, జింక్ వంటి ఇతర ముఖ్యమైన ఖనిజ పదార్థాలపై బేసిక్ కస్టమ్ డ్యూటీ (BCD)ని తొలగించింది. ఈ మినరల్స్ బ్యాటరీలు, సెమీకండక్టర్లు, పునరుత్పాదక ఇంధన పరికరాల (రెన్యూవబుల్ ఎనర్జీ డివైజెస్) తయారీలో కీలకంగా ఉంటాయి. ఇప్పుడు వీటిపై ప్రాథమిక కస్టమ్స్ సుంకం తొలగించడంతో ఈ మెటీరియల్స్​పై ఆధారపడిన EVలు, క్లీన్ ఎనర్జీ అండ్ ఎలక్ట్రానిక్స్ వంటి పరిశ్రమల తయారీ ఖర్చు తగ్గనుంది.

వీటితో పాటు EV బ్యాటరీ ఉత్పత్తిలో ఉపయోగించే 35 అదనపు వస్తువులు, మొబైల్​ ఫోన్ బ్యాటరీ తయారీకి ఉపయోగపడే 28 రకాల వస్తువులను సుంకం రహితంగా చేశారు. ఈ మినహాయింపుతో కంపెనీలు బ్యాటరీ ప్రొడక్షన్​కు అవసరమైన మిషనరీ అండ్ ఎక్విప్మెంట్​ను ఎటువంటి అదనపు ఖర్చు లేకుండా దిగుమతి చేసుకోవచ్చు. దీంతో ఎలక్ట్రిక్ వాహనాల్లో ఉపయోగించే లిథియం అయాన్​ బ్యాటరీలు, క్యారియర్ గ్రేడ్ ఈథర్​నెట్​ స్విచ్​లు, దిగుమతి చేసుకున్న ప్రీమియం కార్లు, మోటార్​ సైకిళ్లు వంటి వాటి ధరలు తగ్గనున్నాయి.

మన దేశంలోని టాటా మోటార్స్, ఓలా ఎలక్ట్రిక్ అండ్ రిలయన్స్ వంటి ఎలక్ట్రిక్ వాహన తయారీ సంస్థలు దేశీయంగా తమ కార్యకలాపాల విస్తరణను ప్రోత్సహించే ఉద్దేశంతో కేంద్ర ప్రభుత్వం ఈ మినహాయింపులు ప్రకటించింది. ప్రభుత్వ ఈ నిర్ణయం ఉత్పత్తి ఖర్చులను కూడా తగ్గిస్తుంది. ఇది దేశీయ తయారీని పెంచుతుంది. చైనా వంటి ఇతర దేశాలపై ఆధారపడటాన్ని తగ్గిస్తుంది.