ఐఫోన్ యూజర్లకు అలర్ట్​ - iOSలోకి తొలిసారి వైరస్ ఎంట్రీ! మీ బ్యాంక్ అకౌంట్ జర భద్రం!

First Ever iOS Trojan Discovered : ఐఫోన్ యూజర్లకు అలర్ట్​. ఐఓఎస్​లోకి తొలిసారిగా అత్యంత ప్రమాదకరమైన ట్రోజన్ ప్రవేశించింది. ఇది యూజర్ల ఫేస్​ ఐడీని బ్రేక్ చేసి, వారి బ్యాంక్ ఖాతా వివరాలను తస్కరిస్తోంది. యూజర్లు అప్రమత్తంగా ఉండకపోతే, వారి బ్యాంక్ ఖాతాలోని డబ్బులు పోగొట్టుకోవడం ఖాయం. పూర్తి వివరాలు మీ కోసం.

First Ever iOS Trojan Discovered :చాలా మంది ఆండ్రాయిడ్ ఫోన్ల కంటే ఐఫోన్​లను ఉపయోగించడానికి ఇష్టపడతారు. దీనికి ప్రధాన కారణం సెక్యూరిటీ. అయితే ఇప్పుడు దీనికి కూడా పెద్ద గండి పడింది. ఐఓఎస్​లోకి మొదటిసారిగా ప్రమాదకరమైన బ్యాంకింగ్ ట్రోజన్ ప్రవేశించింది. వాస్తవానికి ఇది ఆండ్రాయిడ్ ఫోన్లలోకి కూడా ప్రవేశిస్తుంది. యూజర్లు జాగ్రత్తగా లేకపోతే వారి బ్యాంక్ ఖాతా ఖాళీ కావడం ఖాయమని నిపుణులు హెచ్చరిస్తున్నారు.

ఫేస్​ ఐడీ బ్రేక్ చేస్తున్న ట్రోజన్
గ్రూప్​-ఐబీ అనే సంస్థ విడుదల చేసిన రిపోర్ట్ ప్రకారం, ఆండ్రాయిడ్​ ట్రోజన్​ అయిన 'గోల్డ్ డిగ్గర్​'నే మోడిఫై చేసి, 'గోల్డ్​​పిక్​యాక్స్​'గా మార్చారు. ఇది ఆండ్రాయిడ్ ఫోన్లనే కాదు, ఐఫోన్లలోనూ ప్రవేశిస్తోంది.

ఈ నయా ట్రోజన్ ఐఫోన్ యూజర్ల ఫేస్​ ఐడీని బ్రేక్ చేస్తోంది. దీని ద్వారా యూజర్ల బ్యాంక్ అకౌంట్ వివరాలను తస్కరిస్తోంది. వీటిని ఉపయోగించి, సైబర్ నేరగాళ్లు, యూజర్ల బ్యాంకు ఖాతాలోని సొమ్మును కాజేస్తున్నారు.

ఈ గోల్డ్​పిక్​యాక్స్ అనే ట్రోజన్​ టెక్ట్స్ మెసేజ్​లను కూడా తెరచి చదవగలుగుతోంది. అంతేకాదు యూజర్ల బయోమెట్రిక్ డేటాను కలెక్ట్ చేస్తోంది. వీటితో చాలా సులువుగా ఏఐ డీప్​ఫేక్​ ఫొటోలు, ఇమేజ్​లు కూడా క్రియేట్ చేయవచ్చు. ఇది యూజర్ల భద్రతకు ఎంతో చేటు చేస్తుంది.

టార్గెట్ చేస్తున్నారు!
సైబర్ నేరగాళ్లు మొదటిసారిగా వియత్నాం, థాయిలాండ్​ల్లోని కొందరిని టార్గెట్​ చేసుకుని, ఈ ట్రోజన్​ను ప్రయోగించారు. ఇది కనుక విజయవంతం అయితే, ఇతర మాల్వేర్స్ లాగానే దీనిని కూడా యూఎస్​ సహా ఇంగ్లీష్ మాట్లాడే దేశాలన్నింటిలోనూ ప్రవేశపెట్టే అవకాశం ఉంది.

ఆండ్రాయిడ్ యూజర్లకూ ముప్పే!
ఈ నయా బ్యాంకింగ్ ట్రోజన్​తో ఐఫోన్ యూజర్లకే కాదు, ఆండ్రాయిడ్ యూజర్లకు కూడా ప్రమాదం పొంచి ఉంది. కనుక తగిన జాగ్రత్తలు తీసుకోవాలని సైబర్ నిపుణులు సూచిస్తున్నారు.

చాలా మంది ఆండ్రాయిడ్ యూజర్లు హానికరమైన (malicious) యాప్స్ ఉపయోగిస్తుంటారు. ఇలాంటి యాప్స్​ ద్వారా ఈ బ్యాంకింగ్​ ట్రోజన్​ మీ డివైజ్​లోకి ప్రవేశించే అవకాశం ఉంది. అలాగే మరికొందరు సైబర్​ క్రిమినల్స్ ఫిషింగ్ అటాక్స్ చేసి, ఆండ్రాయిడ్ ఫోన్లలోకి మాల్వేర్​లను పంపిస్తూ ఉంటారు. అయితే ఐఫోన్స్​లోకి ఇలా మాల్వేర్​లను, ట్రోజన్​లను పంపించడం కాస్త కష్టమే. అయినప్పటికీ సైబర్ క్రిమినల్స్​ లేటెస్ట్ టెక్నాలజీ ఉపయోగించి, ఐఓఎస్​ల్లోకి కూడా ట్రోజన్​లను పంపిస్తున్నారు.

ఒకే ఒక్కడు
గ్రూప్​-ఐబీ ప్రకారం, గోల్డ్​పిక్​యాక్స్​, గోల్డ్​డిగ్గర్​ ట్రోజన్లను తయారు చేసింది ఒక్కరే. అతని లేదా ఆ సంస్థ కోడ్ నేమ్ గోల్డ్ ఫ్యాక్టరీ. అయితే సెక్యూరిటీ రీసెర్చర్ల పరిశోధనలో మరో కొత్త మాల్వేర్​ కూడా కనిపించింది. అదే 'గోల్డ్​డిగ్గర్ ప్లస్​'. దీనిని ఉపయోగించి, హ్యాకర్లు రియల్ ​టైమ్​లో బాధితుడితో మాట్లాడగలరు. పైగా బాధితుడి ఆండ్రాయిడ్, ఐఫోన్​లను నేరుగా కంట్రోల్ చేయగలరు.

సేఫ్టీ టిప్స్​
యాపిల్ కంపెనీ ఇప్పటికే ఈ ట్రోజన్​ను కంట్రోల్ చేసే పనిలో ఉంది. అంతేకాదు, యూజర్లు తమ డివైజ్​లను సురక్షితంగా ఉంచుకునేందుకు ఎలాంటి టిప్స్ పాటించాలే తెలియజేసింది. అవేంటో ఇప్పుడు చూద్దాం.

1. ఐఫోన్ యూజర్లు TestFlight ద్వారా ఏ యాప్​ను కూడా ఇన్​స్టాల్ చేసుకోకూడదు. ఎందుకంటే ఈ టెస్ట్​ఫ్లైట్​ ద్వారానే ఈ బ్యాంకింగ్​ ట్రోజన్​ ఐఫోన్​, ఐప్యాడ్​ల్లోకి ప్రవేశించే అవకాశం ఉంది. కనుక ఎవరు చెప్పినా, టెస్ట్​ఫ్లైట్​ ద్వారా యాప్స్ డౌన్​లోడ్ చేసుకోకూడదు.

2. మొబైల్ డివైజ్ మేనేజ్​మెంట్​ (ఎండీఎం) ప్రొఫైల్ ద్వారా కూడా, అన్​-ఆథరైజ్డ్​ యాప్స్​ డౌన్​లోడ్ చేసుకోకూడదు. కేవలం మీ ఎంప్లాయిర్​ చెబితే మాత్రమే ఈ ఎండీఎం ప్రొఫైల్​ ద్వారా యాప్స్ డౌన్​లోడ్ చేసుకోవాలి. అది కూడా కంపెనీ వాళ్లు ఇచ్చే ఐఫోన్​లో మాత్రమే. మీ సొంత ఫోన్​లో ఎవరు చెప్పినా ఎండీఎం ప్రొఫైల్ ద్వారా యాప్స్ డౌన్​లోడ్ చేసుకోకూడదు.

3. ఆండ్రాయిడ్ ఫోన్ల కోసం మంచి యాంటీ వైరస్​లు చాలానే ఉన్నాయి. కానీ ఐఓఎస్ డివైజ్​లకు సంబంధించి, పెద్దగా యాంటీవైరస్​లు లేవు. అయితే ఐఓఎస్ యూజర్లు తమ ఐఫోన్​, ఐపాడ్​లను యూఎస్​బీ ద్వారా మ్యాక్​బుక్​కు కనెక్ట్​ చేసుకుని, intego mac internet security x9 లేదా intego mac premium bundle x9తో స్కాన్​ చేసుకోవాలి. దీని ద్వారా తమ డివైజ్​ల్లోని మాల్వేర్లను, ట్రోజన్​లను సులువుగా రిమూవ్ చేసుకోవచ్చు.

4. ఆండ్రాయిడ్ ఫోన్ యూజర్లు లాక్​డౌన్​ మోడ్​ను ఉపయోగించాలి. ఇది వివిధ యాప్​ల ఫంక్షనాలిటీని నియంత్రిస్తుంది. కనుక మాల్వేర్స్​, ట్రోజన్స్ ఎటాక్ నుంచి చాలా వరకు తప్పించుకోవచ్చు.