కొత్త యూజర్లకు మస్క్ షాక్ - ఇకపై 'X'లో పోస్ట్ చేయాలంటే డబ్బులు కట్టాల్సిందే! - Elon Musk Plans To Charge X Users

Elon Musk Plans To Charge New X Users : ప్రముఖ సామాజిక మాధ్యమ సంస్థ ఎక్స్(ట్విట్టర్) కీలక నిర్ణయం తీసుకుంది. కొత్తగా ఎక్స్‌ అకౌంట్‌ తీసుకునేవారు డబ్బులు చెల్లించాల్సి ఉంటుందని తెలిపింది. కొత్త యూజర్లు ఎక్స్‌లో పోస్ట్‌ చేయాలన్నా, ట్వీట్​లకు లైక్‌ చేయాలన్నా, రిప్లై ఇవ్వాలన్నా, చివరికి బుక్‌మార్క్‌ చేయడానికి కూడా రుసుము చెల్లించాల్సి ఉంటుందని స్పష్టం చేసింది.

Elon Musk Plans To Charge New X Users : ప్రముఖ సోషల్ మీడియా ఫ్లాట్​ఫామ్ ఎక్స్‌(ట్విట్టర్) యూజర్లకు ఎలాన్‌ మస్క్‌ మరోసారి షాకిచ్చారు. కొత్తగా ఎక్స్‌(ట్విట్టర్) అకౌంట్‌ తీసుకునేవారు డబ్బులు చెల్లించాల్సిందేనని ఎలాన్ మస్క్ స్పష్టం చేశారు. కొత్త యూజర్లు ఎక్స్‌లో పోస్ట్‌ చేయాలన్నా, ట్వీట్​లకు లైక్‌ చేయాలన్నా, రిప్లై ఇవ్వాలన్నా, చివరికి బుక్‌మార్క్‌ చేయాలన్నా ఛార్జ్ వసూలు చేయనున్నట్లు వెల్లడించారు.

బాట్స్​ను అడ్డుకోవడానికే!
కొత్త ఎక్స్​ వినియోగదారులు నామమాత్రపు వార్షిక రుసుమును చెల్లించాల్సి ఉంటుందని ఎలాన్ మస్క్​ పేర్కొన్నారు. దురదృష్టవశాత్తూ కొత్త యూజర్లు రైటింగ్ యాక్సెస్ కోసం చిన్నమొత్తంలో రుసుము చెల్లించాల్సి ఉంటుందని చెప్పారు. బాట్‌ల దాడిని అరికట్టడానికి ఇదే ఏకైక మార్గమన్నారు. మూడు నెలల తర్వాత కొత్త యూజర్లు ఎక్స్​లో ఉచితంగా ట్వీట్​లు, పోస్ట్​లు పెట్టగలరని పేర్కొన్నారు.

ట్విట్టర్​ను కొనుగోలు చేసిన తర్వాత పలు మార్పులు చేపట్టారు ఎలాన్ మస్క్. ఇప్పటికే ట్విట్టర్ పేరును ఎక్స్​గా మార్చారు. ఎక్స్ మాధ్యమంలో సమూల మార్పులకోసం కీలక నిర్ణయాలు తీసుకుంటున్నారు. ఇందులో భాగంగానే కొత్త యూజర్లపై ఛార్జీల భారం వేశారు. అయితే ఈ ఛార్జీల పెంపుపై యూజర్ల నుంచి తీవ్ర వ్యతిరేకత వ్యక్తమయ్యే అవకాశాలున్నాయి.

ఎలాన్‌ మస్క్‌ సారథ్యంలోని ఎక్స్ పెద్ద సంఖ్యలో భారతీయుల ఖాతాలపై ఇటీవలే నిషేధం విధించింది. ఐటీ రూల్స్ 2021 ఉల్లంఘన కారణంగా ఫిబ్రవరి 26 - మార్చి 25 మధ్య మొత్తం 2,12,627 ఖాతాలను తొలగించినట్లు ఎక్స్ వెల్లడించింది. వీటిలో చిన్నారులపై లైంగిక వేధింపులను, నగ్న దృశ్యాలు ప్రోత్సహించే ఖాతాలు ఉన్నాయని పేర్కొంది. కంపెనీ నెలవారీ నివేదికలో ఈ విషయాన్ని ప్రకటించింది.

‘భారత్‌లోని యూజర్ల నుంచి 5,158 ఫిర్యాదులను స్వీకరించామని, వాటిలో 86 ఫిర్యాదుల్ని ప్రాసెస్‌ చేశామని ఎక్స్ పేర్కొంది. పరిశీలన అనంతరం వాటిలో 7 అకౌంట్లను రద్దు చేశామని తెలిపింది. భారత్‌ యూజర్ల నుంచి వచ్చిన ఫిర్యాదుల్లో వేధింపులు (3,074), ద్వేషపూరిత ప్రవర్తన (412), అడల్ట్‌ కంటెంట్ (953) వంటి అంశాలకు సంబంధించినవి ఉన్నాయని తెలిపింది. ఉగ్రవాదాన్ని ప్రోత్సహించేలా ఉన్న 1,235 ఖాతాలను తొలగించినట్లు పేర్కొంది.